Roli edukues i shkollës në ndërgjegjësimin e të rinjve për parandalimin e migracionit të parregullt

Organizuar nga Komiteti Shqiptar i Helsinkit

Kukës, më 27 shkurt 2008

Në datën 27 shkurt 2008, Komiteti Shqiptar i Helsinkit organizoi në rrethin e Kukësit një tryezë të rrumbullakët me temë “Roli edukues i shkollës në ndërgjegjësimin e të rinjve për parandalimin e migracionit të parregullt”. Ndërmarrja e një nisme të tillë u krye në përputhje me detyrimet e parashikuara në Planin Kombëtar të Zbatimit të Marrëveshjes së Stabilizim-Asociimit si edhe në kuadër të misionit të KShH për sensibilizimin e publikut në tërësi dhe të rinjve në veçanti me synim garantimin e lëvizjes së lirë e të ligjshme të qytetarëve si edhe për parandalimin e migracionit të parregullt.

Qëllimi i tryezës ishte rritja e rolit të shkollës në ndërgjegjësimin e të rinjve për parandalimin e migracionit të parregullt dhe në informimin më të mirë të tyre për mundësitë e migracionit të rregullt. Në këtë tryezë morën pjesë dhe kontribuan me pjesëmarrjen e tyre përfaqësues të Drejtorisë Arsimore, drejtuesit e të gjithë shkollave të mesme dhe 9-vjeçare të rrethit të Kukësit, mësuesit e lëndëve sociale, psikologët si edhe përfaqësues nga bordet e prindërve dhe qeveritë e nxënësve.

Disa nga temat kryesore që u trajtuan në tryezë ishin: niveli i ulët i njohurive dhe i informacionit të mësuesve dhe të vetë të rinjve lidhur me mundësitë ligjore për migrimin e rregullt dhe risqet e pasojat me të cilën shoqërohej migrimi i parregullt; nevoja e botimit të materialeve informuese dhe sensibilizueze në këtë fushë; nevoja e angazhimit të shkollës, mësuesve, bordeve të prindërve dhe qeverive të nxënësve për ndërgjegjësimin e të rinjve si dhe organizimi i trajnimeve dhe kualifikimeve profesionale për të rinjtë që duan të migrojnë jashtë vendit për qëllime punësimi. KShH evidentoi nevojën e angazhimin më serioz dhe efektiv të institucioneve shtetërore vendore, aktorëve të shoqërisë civile si dhe medias në bashkërendimin e tyre për një sensibilizim më të mirë të shoqërisë në përgjithësi dhe të rinjve në veçanti lidhur me mundësitë e migracionit të rregullt. Në përfundim të tryezës, KShH i prezantoi institucioneve përgjegjëse shtetërore disa nga konkluzionet dhe rekomandimet kryesore me qëllim marrjen e masave konkrete për luftimin e migracionit të parregullt.

Sa më sipër, KShH falenderon pjesëmarrësit për kontributin e dhënë në tryezë, si edhe parterët e tij CORDAID dhe Komitetin Norvegjez të Helsinkit për mbështetjen financiare të veprimtarisë.