20.02.2008

Në kuadër të sensibilizimit dhe rritjes së kapaciteteve të punonjësve të drejtësisë dhe policisë për zbatimin e rekomandimeve të Komisionit Evropian kundër Racizmit dhe Intolerancës (ECRI) të paraqitura në Raportin e tij III për Shqipërinë 2005, Komiteti Shqiptar i Helsinkit, në bashkëpunim me Shkollën e Magjistraturës, Drejtorinë e Përgjithshme të Policisë së Shtetit dhe ECRI-n, në datat 18-19 Shkurt 2008 zhvilloi dy trajnime: një trajnim me gjyqtarë, prokurorë dhe oficerë të Policisë Gjyqësore dhe një trajnim me oficerë të Policisë së Shtetit.

Në të dy trajnimet u trajtuan probleme të tilla si: rekomandimet e ECRI-t dhe legjislacioni shqiptar në fushën e diskriminimit racial dhe intolerancës; rekomandimet e ECRI-t për sistemin gjyqësor, policinë dhe zbatuesit të ligjeve; roli i policisë, prokurorëve dhe gjyqtarëve në parandalimin dhe luftën e racizmit, intolerancës dhe diksiriminimit, probleme të praktikës në Shqipëri.

Në trajnim morën pjesë punonjës të organeve të policisë, të prokurorisë, Policisë Gjyqësore, të cilët vinin nga rrethe në të cilat ka përqëndrime të minoritetit Rom dhe komunitetit Egjyptian.

Trajnimi u ofrua nga Znj. Sarah Burton, juriste pranë Sekretariatit të Përgjithshëm të ECRI-t, Vasilika Hysi, Drejtore Ekzekutive e KSHH-së dhe anëtare e ECRI-t, Znj. Suela Mëneri, juriste, përfaqësuese ligjore pranë Ministrisë së Punëve të Jashtme.

Trajnimi u vlerësua nga pjesëmarrësit për të rejat që ofroi në fushën e teorike dhe praktike, trajtimin e rasteve praktike dhe profesionalizimin e ekspertizës së ofruar.  

Sa më sipër, KSHH falenderon ECRI-n, Drejtorinë e Përgjithshme të Policisë dhe Shkollën e Magjistraturës për bashkëpunimin në realizimin e këtyre trajnimeve, si edhe CORDAID për mbështetjen e veprimtarisë së KSHH-së në fushën e diskriminimit dhe intolerancës.