Dhuna ndaj gazetarëve synon mposhtjen e fjalës së lirë

21.05.2008

Sipas njoftimeve të medias, në qytetin e Burrelit ka ndodhur një ngjarje e shëmtuar, brutale dhe e dëmshme. Gjyqtari i Gjykatës së Shkallës së Parë z.Murat Lleshi, para selisë së gjykatës për t’ju shmangur disa sqarimeve që kërkoheshin lidhur me një çështje nga gazetari i “Fiks fare”, z.Ksenofon Ilia së bashku me vëllain e tij me makinën e tyre kanë goditur gazetarin, e kanë përplasur në tokë dhe e kanë zvarritur për disa metra duke i shkaktuar dëmtime në trup dhe sidomos në të dy këmbët. Ndihmën e parë atij i është dhënë në spitalin e qytetit.

Komiteti Shqiptar i Helsinkit (KShH) ka parasysh se një nga detyrat e medias është ajo e marrjes së informacionit dhe të transmetimit të tij publikut të gjerë.

Gazetari Ksenofon Ilia nëpërmjet takimit me gjyqtarin dhunues desh të sqaronte çështjen e një peticioni drejtuar atij nga banorët e komunës Qukaj. Për t’iu shmangur takimit me gazetarin si rrjedhim edhe dhënies së informacionit përkatës me mospërfillje dhe egërsi ai rrezikoi shëndetin dhe jetën e tij.

KShH dënon ashpër këtë akt dhune ndaj gazetarit Ilia si edhe fyerjet ndaj grupit të xhirimit aq më tepër sepse autor i kësaj vepre të dëmshme është personi i veshur me petkun e gjyqtarit që ka për detyrë të mbrojë në përgjithësi të drejtat e shtetasve dhe në veçanti lirinë e shtypit.

KShh ka besim se Këshilli i Lartë i Drejtësisë dhe organet e ndjekjes do të marrin masat përkatëse në përputhje me ligjin.

Me këtë rast, KShH e shikon të nevojshme të evidentojë faktin se presionet dhe aktet e dhunës ndaj gazetarëve nuk kanë qënë të pakta. Kështu, para disa ditëve në afërsi të selisë së Partisë Demokratike u ushtrua dhunë edhe ndaj gazetarit të gazetës “Sot”, zv.kryeredaktorit z. Përparim Halilit.

Komiteti Shqiptar i Helsinkit shpreson se organet përkatëse do të sqarojnë me efektivitet rrethanat e ngjarjes dhe motivet për të cilat u krye ajo. Ka dyshime të bazuara se z.Halili është goditur për shkak të shkrimeve kritike të gazetës “Sot” dhe vetë atij ndaj organeve shtetërore.

KShH mendon se nëse një shkrim i botuar në këtë apo atë organ shtypi përmban të dhëna të pasakta, mjeti demokratik është përgënjeshtrimi dhe jo presioni dhe dhuna.