Rritja e bashkëpunimit ndërmjet institucioneve shtetërore në nivel lokal në luftën kundër migracionit të parregullt

Organizuar nga Komiteti Shqiptar i Helsinkit

Kukës, më 28 shkurt 2008

Në datën 28 shkurt 2008, KShH organizoi në rrethin e Kukësit një tryezë të rrumbullakët me qëllim rritjen e ndërgjegjësimit dhe të bashkëpunimit ndërmjet institucioneve shtetërore në nivel vendor për të parandaluar dhe luftuar fenomenin e kalimit të paligjshëm të kufinjve. Gjithashtu, tryeza synoi të rrisë bashkëpunimin e institucioneve shtetërore vendore me aktorë të ndryshëm të shoqërisë civile për informimin dhe sensibilizimin më të mirë të qytetarëve mbi mundësitë e migracionit të ligjshëm.

Në këtë tryezë morën pjesë dhe kontribuan me pjesëmarrjen e tyre përfaqësues nga Drejtoria e Përgjithshme e Policisë, Departamenti i Kufirit dhe Migracionit, përfaqësues të nivelit të lartë të institucioneve shtetërore në nivel  vendor si nga: Bashkia, Prefektura, Këshilli i Qarkut, Drejtoria e Policisë së Qarkut, Zyra Rajonale e Shërbimit të Punësimit dhe Shërbimit Social si edhe përfaqësues të organizatave jofitimprurëse vendase. Iniciativa u ndërmor nga KShH-ja në kuadër të misionit të tij për sensibilizimin e qytetarëve me synim garantimin e lëvizjes së lirë e të ligjshme të tyre si dhe në përputhje me objektivat e vendosura në Planin Kombëtar të Zbatimit të Marrëveshjes së Stabilizim-Asociimit.

Disa nga çështjet e diskutuara në tryezë ishin: faktorët nxitës të migrimit të parregullt si varfëria, niveli i lartë i papunësisë, mungesa e informacionit për format e ligjshme të migrimit; nevoja për rritjen e vëmendjes ndaj rrethit të Kukësit dhe rretheve të tjera veriore nga institucionet shtetërore, shoqëria civile dhe donatorët e huaj për përmirësimin e gjendjes ekonomike dhe zbutjen e papunësisë; rritja e aftësive thithëse të buxhetit shtetëror nga ana e organeve vendore për trajtimin më të diferencuar të këtij rrethi; bashkëpunimi me biznesin vendas për nxitjen e punësimit si dhe roli i Zyrës Rajonale të Shërbimit të Punësimit në hartimin dhe zbatimin e politikave efikase të punësimit. Gjithashtu, pjesëmarrësit theksuan nevojën se rritja e ndërgjegjësimit qytetar për luftimin e migrimit të parregullt duhet të realizohet përmes një bashkëpunimi më efikas ndërmjet autoriteteve shtetërore qëndore dhe vendore, aktorëve të shoqërisë civile dhe medias.

KShH përfundimet dhe sugjerimet kryesore të tryezës ia bëri të njohura institucioneve përgjegjëse shtetërore me synim marrjen e masave konkrete për garantimin e lëvizjes së lirë dhe të rregullt të qytetarëve.

Veprimtaria u mundësua falë mbështetjes financiare të partnerëve të KShH, CORDAID dhe Komitetit Norvegjez të Helsinkit.