Monitorimi i zgjedhjeve të 28 qershorit 2009 në vemendje të KSHH

15.04.2009

Komiteti Shqiptar i Helsinkit (KShH-ja) organizata e parë joqeveritare (jofitimprurëse), ka monitoruar dhe do të vazhdojë të monitorojë zgjedhjet periodike në Shqipëri. KSHH do të vëzhgojë procesit parazgjedhor, fushatën eletorale dhe zgjedhjet e 28 qershorit 2009 me qëllim që të kontribuojë për respektimin e votës së lire të zgjedhësve, zhvillimin e zgjedhjeve të lira,  të ndershme dhe demokratike dhe për përmirësimin e mëtejshëm të reformës zgjedhore në frymën e dokumentave ndërkombëtare.

KShH-ja është në procesin e akreditimit të rreth 150 vëzhguesve afatgjatë dhe afatshkurtër, mes të cilëve edhe të korrespondentëve të tij në disa qarqe.  Vëzhgimi do të shtrihet kryesisht në rrethet: Tiranë, Durrës, Fier, Gjirokastër, Korçë, Kukës, Shkodër, Vlorë dhe Elbasan. Vëzhguesit do të trajnohen gjatë 4 trajnimeve rajonale që do të zhvillohen në Tiranë, Fier, Shkodër dhe Elbasan lidhur me kodin zgjedhor, metodologjinë e vëzhgimit dhe raportimit.

Fushat e monitorimit të KSHH-së do të jenë: aspekte të veçanta të procesit parazgjedhor dhe të fushatës zgjedhore, konkretisht kërkesat dhe ankesat e qytetarëve për listat paraprake të votuesve, shpallja e listave përfundimtare të votuesve, rregjistrimi i partive politike dhe koalicioneve, pajisja e qytetarëve me kartat e identitetit, trajnimi në kohë i komisionerëve, ngritja në kohë e grupeve të numërimit, ngritja e KQV-ve dhe emërimi i anëtarëve tyre Brenda afateve ligjore. Gjithashtu, KSHH do të monitorojë respektimn e Kodit të Etikës nga partitë politike dhe kandidatët e tyre; procesi i votimit dhe numërimit të votave.

KSHH-ja do të ndjekë gjithashtu, mbarëvajtjen e përgatitjes për zgjedhje dhe në varësi të problemeve që mund të dalin, ai do të mbajë kontakte me Komisionin Qëndror të Zgjedhjeve dhe organizatat e tjera vëzhguese vendase dhe të huaja.

Bazuar në të dhënat e mbledhura dhe problemet që mund të shfaqen, KShH-ja mund të dalë me reagime publike, të informojë institucionet përkatëse për zgjidhjen e problemeve. Në përfundim të procesit të votimit do të dilet me një raport paraparak dhe në përfundim të procesit zgjedhor me një raport përfundimtar ku do të përshihen edhe rekomandimet e nevojshme për përmirësimin e procesit zgjedhor në Shqipëri.

Vëzhgimi i zgjedhjeve parlamentare të 28 qershorit 2009 mbështetet  finaciarisht nga Programi i Granteve të Vogla i Komisionit për Demokraci i Ambasadës se SH.B.A.-se ne Tiranë.