6 ditë para zgjedhjeve

22.06.2009

Komiteti Shqiptar i Helsinkit (KSHH) në prag të zgjedhjeve të 28 qershorit 2009, e sheh të nevojshme t’i drejtohet partive politike dhe vetë zgjedhësve në mënyrë që së bashku të arrijmë qëllimin kryesor – zhvillimin e zgjedhjeve të lira dhe të ndershme.

Në këtë vështrim, vullneti politik dhe zbatimi rigoroz i ligjit janë faktorë të rëndësishëm që në këto zgjedhje parlamentare të zhvillohen me standardet që kërkohen për zgjedhje të lira e të drejta.

Në këtë kuadër, vetëm 6 ditë përpara zgjedhjeve, KSHH e sheh të nevojshme të ritheksojë edhe njëherë thirrjen për zhvillimin e një fushate të qetë, duke shmangur gjuhën e urrejtjes, gjë që do të ndikonte pozitivisht edhe në atmosferën e ditës së votimit. Është koha të bëjmë kujdes më shumë, që të mos lejojmë në asnjë mënyrë, eksese të atilla, si ato që shpunë në humbjen e jetës së militiantit të Partisë Demokratike në Qerret të Kavajës, apo eksese që shpunë në thyerjen e qendrave të votimit, presioneve ndaj kandidatëve për deputetë, etj.. Zgjedhësit janë të qartë sot, se qëllimi ynë kryesor mbetet përmbushja e standardeve.

KSHH shpreh shqetësimin se mjaft KQV ende nuk janë emëruar. Kjo ndodh se partitë politike përkatëse nuk i kanë paraqitur KZAZ-ve propozimet. Si rrjedhim është shkelur neni 36 i Kodit Zgjedhor që kërkon emërimin e të gjitha KQV-ve jo më vonë se data 8 qershor 2009. Për KSHH-në kjo vonesë vë në dyshim trajnimin cilësor të anëtarëve të KQV-ve.

Shqetësim tjetër është ai i disa ndryshimeve, bashkimeve apo ndarjeve pa kriter dhe jashtë afateve ligjore të qëndrave të votimit. Veprime të tilla mund të sjellin konfuzion, sorrollatje dhe pakënaqësi të zgjedhësve. KSHH i sugjeron KQZ-së që në interes të ecurisë të procesit të rregullt zgjedhor të ndërhyjë për të parandaluar pasojat e dëmshme pavarësisht se ligji me këtë detyrë ka ngarkuar njësitë e qeverisjes vendore.

Veç kësaj, brenda datës 24 qershor 2009, në zbatim të nenit 95 të Kodit zgjedhor, partitë politike duhet ti paraqesin KZAZ-ve propozimet për anëtarët e grupeve të numërimit të votave. Çdo vonesë në këtë drejtim do të vinte në pikëpyetje jo vetëm ngritjen e grupeve të numërimit dy ditë para ditës së votimit, por dhe për trajnimin e tyre.

KZAZ-të, KQV-të dhe Grupet e numërimit të votave luajnë një rol të rëndësishëm në aspektet e ndryshme të administrimit zgjedhor. Është kjo arsyeja që KSHH i sugjeron partive përkatëse politike që, me përjashtim të rasteve të rralla dhe të domosdoshme, të mos kërkojnë zëvendesimin e anëtarëve të propozuar prej tyre.

Dita përpara datës së zgjedhjeve dhe data e zgjedhjeve deri në orën e mbylljes së votimit, sipas nenit 77 të Kodit Zgjedhor, është periudha e heshtjes zgjedhore.

KSHH sugjeron që dispozita e mësipërme të respektohet nga të gjithë subjektet zgjedhore si dhe nga media.

KSHH, duke patur parasysh përvojën negative të zgjedhjeve të mëparshme e shikon të nevojshme të theksojë se partitë politike, kandidatët për deputetë apo persona të tjerë nuk duhet të ndërhyjnë në veprimtarinë e komisioneve zgjedhore dhe të grupeve të numërimit. Në të kundërtën kjo mund të shkaktonte konflikte, zvarritje dhe ndërprerje në dëm të procesit zgjedhor.

Me këtë rast, KSHH i bën thirrje zgjedhësve që kanë aplikuar për karta identiteti por nuk i kanë tërhequr, të shkojnë sa më parë në qëndrat përkatëse dhe të pajisen me to. Kjo do të mundësonte ushtrimin prej tyre të së drejtës për të votuar. Gjithashtu, KSHH kujton të gjithë qytetarët që nuk kanë emrat në listat përfundimtare, t’i drejtohen sa më parë gjykatës.

Në përfundim, KSHH i bën thirrje zgjedhësve për nevojën e një pjesëmarrjeje sa më të gjërë në votimet e 28 qershorit 2009.

Këto janë zgjedhje tepër të rëndësishme, janë provë pjekurie dhe ndërgjegjësimi për një të ardhme më të mirë, për një demokraci më të konsoliduar.

Arritja e standarteve në zgjedhjet e 28 qershorit kushtëzon integrimin më të shpejtë të vendit tonë në BE.