Zgjedhjet Parlamentare 2009, KSHH trajnon vëzhguesit e saj afatgjatë në Tiranë, Fier, Elbasan dhe Shkodër

27.05.2009

Komiteti Shqiptar i Helsinkit, gjatë periudhës prill dhe maj 2009 zhvilloi disa trajnime për vëzhguesit e saj afat-gjatë, konkretisht në datën 24 prill 2009 në Tiranë, në datën 9 maj 2009 në Elbasan, 14 maj në Fier dhe në 16 maj në Shkodër.

Në këto trjanime morën pjesë të gjithë vëzhguesit afatagjatë të KSHH-së, të akredituar tashmë nga Komisioni Qëndror i Zgjedhjeve. Ashtu siç dihet KSHH do të shtrijë monitorimin e procesit parazgjedhor, ditës së votimit dhe procesit të numërimit në disa qytete kryesore të vendit, si Tiranë, Durrës, Shkodër, Vlorë, Fier, Kukes, Gjirokastër, Elbasan dhe Korçë.

Një rol të rëndësishëm do të kenë dhe korrespondentët e KSHH-së në këto rrethe të cilët ishin pjesëmarrës në këto trajnime.

 Qëllimi kryesor i trajnimeve ishte rritja e kapacitetit të vëzhguesve afatgjatë, me qëllim vëzhgimin e procesit parazgjedhor dhe atij zgjedhor në mënyrë të paanshme, objektive dhe profesionale. Gjatë trajnimit, vëzhguesit u njohën me aspekte praktike dhe teorike të legjislacionit zgjedhor, të drejtat dhe detyrat e vëzhguesve, menaxhimin e zgjedhjeve, krijimin dhe funksionimin e Komisionit Qendror të Zgjedhjeve, i KZAZ-ve si dhe Komisione të tjera që do të administrojnë procesin e zgjedhjeve, procesin parazgjedhor, listat e votuesve, fushatës elektorale, procesin e votimit dhe numërimit, etj.

Vëzhguesit e KSHH u njohën me një manual të hartuar nga ekspertë të Komitetit Shqiptar të Helsinkit lidhur me çështje të Kodit zgjedhor, manual i cili adreson aspektet më të rëndësishme mbi të cilat vëzhguesit e KSHH do të përqendrohen gjatë misionit të vëzhgimit të zgjedhjeve parlamentare të 28 qershor 2009.