Për dialogun e shpejtë dhe konstruktiv kërkohet vullnet politik

14.05.2010

Dje, më datën 13/5/2010 u mblodh Asambleja e Komitetit Shqiptar të Helsinkit dhe diskutoi situatën e rëndë politike në vend. Asambleja u shpreh njëzëri se në kushte të tilla, nuk mund të jenë indiferentë organizatat joqeveritare, midis tyre edhe KShH, që për afro 20 vjet është angazhuar në fushën e mbrojtjes të lirive dhe të drejtave të shtetasve.

Pozicionimet diametralisht të kundërta midis mazhorancës qeverisëse dhe opozitës lidhur me hetimin e zgjedhjeve të 28 qershorit 2009, nuk mund të mbyllen brenda kornizave të interesave të forcave të mësipërme. Ato rezatojnë dhe ndikojnë në krejt shoqërinë tonë.

Kjo është arsyeja kryesore që KShH e sheh me vend të shprehë publikisht mendimin e vet, që në këtë moment kritik, mund të shërbente sadopak për të nxitur dialogun midis mazhorancës dhe opozitës.

KShH vlerëson: a) Raportin e OSBE/ODIHR-it lidhur me zgjedhjet e 28 qershorit 2009; b) Rekomandimet e Asamblesë Parlamentare të Këshillit të Evropës dhe të OSBE-së për ngritjen e komisionit që do të hetonte zgjedhjet e 28 qershorit 2009; c) Nismën e Presidentit të Republikës me synim arritjen e dialogut.

KShH konstaton se, për të gjithë është e qartë se sipas nenit 77 të Kushtetutës, ngritja e  Komisionit Hetimor është e detyrueshme, kur kjo kërkohet nga ¼ e të gjithë deputetëve dhe shpreh keqardhjen që kundërshtitë lidhur me objektin e këtij hetimi nuk mundësuan ngritjen e tij.

Pa dashur të trajtojmë detajet e këtyre kundërshtimeve, KShH mendon se Kushtetuta dhe vendimet e Gjykatës Kushtetuese, nuk pengojnë komisionin hetimor që të kqyrë dhe të shqyrtojë dokumentacionin zgjedhor përfshirë këtu edhe fletët e votimit. Ne mendojmë gjithashtu se veprimi i mësipërm nuk cënon ndonjë parim kushtetues siç mund të ishte p.sh ndarja dhe balancimi i pushteteve, pavarësia e gjyqësorit etj. Ato do të cënoheshin nëse në objektin e hetimit do të parashikohej shqyrtimi dhe vlerësimi i bazueshmërisë ligjore të vendimeve të KQZ-së dhe të Kolegjit Zgjedhor të Gjykatës së Apelit.

KShH mendon se pengesë për dialogun dhe zgjidhjen e çështjes është mungesa e vullnetit politik . Nuk i takon KShH-së të shprehet mbi çështjet që mund të ishin objekt dialogu dhe as për modalitetet e hetimit parlamentar, por jemi të sigurt se transparenca e zgjedhjeve do t’i shërbente ç’tensionimit të situatës, funksionimit normal të parlamentit, përpjekjeve të përbashkëta drejt integrimit Evropian.

E shikojmë të nevojshme të theksojmë se transparenca e zgjedhjeve është në përputhje edhe me nenin 23 të Kushtetutës që garanton të drejtën e informimit si dhe me ligjin nr.9503 dt.30.6.1999 “Për të drejtën e informimit për dokumentet zyrtare“.

KShH është i bindur se ekzistojnë mundësitë për dialog. Në një vend demokratik, siç jemi ne, kundërshtarët politikë nuk janë armiq. Në këtë vështrim do të duhet t’i jepet fund gjuhës së urrejtjes dhe akuzave të ndërsjellta. KShH mendon gjithashtu se për arritjen e dialogut është i domosdoshëm predispozicioni i të dy palëve, por do të ishte e rekomandueshme që në këtë drejtim, nisma të merrej nga mazhoranca qeverisëse.