Para ligjit të gjithë të barabartë

17.03.2010

Kanë kaluar afro 6 muaj nga dita kur Kolegji Penal i Gjykatës së Lartë, me vendimin nr. 6, datë 14.09.2009 vendosi pushimin e procedimit penal në ngarkim të të pandehurit Fatmir Mediu, për shkak se ndjekja penale ndaj tij nuk mund të vazhdojë. Kjo Gjykatë ka arsyetuar se “Organi i akuzës nuk mund të mbështetet në kërkimin e vazhdimit të gjykimit kundër të pandehurit mbi bazën e një autorizimi të lëshuar nga Kuvendi i mëparshëm, sepse ky autorizim, për nga vetë natyra e tij, është i kufizuar në kohë. Ky autorizim bie dhe zhvishet nga efektet … edhe kur i pandehuri gjatë gjykimit rifiton një mandat të rregullt parlamentar.” Në vazhdim te arsyetimit të këtij vendimi Gjykata e Lartë është shprehur  se ajo ndodhet në pamundësi për t’i kërkuar Kuvendit të Shqipërisë autorizim për vazhdimin e ndjekjes penale të të pandehurit Fatmir Mediu sepse, sipas ligjit, të drejtën për të kërkuar këtë autorizim e ka vetëm prokurori. Vendimet e Gjykatës së Lartë, siç dihet, janë të formës së prerë.

Komiteti Shqiptar i Helsinkit(KShH) mendon se Prokuroria e Përgjithshme, jo vetëm ka patur e ka të gjitha mundësitë ligjore t’i drejtohet Kuvendit të Shqipërisë me kërkesën për miratimin e një autorizimi të ri që do të mundësonte vazhdimin e ndjekjes penale, në përputhje me vendimin e Gjykatës së Lartë, por ajo ishte e detyruar për një veprim të tillë. Në nenin 292 i K.Pr.P, midis të tjerave, thuhet se vendimi i pushimit për shkak të mungesës së kërkesës për autorizim për procedim nuk pengon ushtrimin e ndjekjes penale, për të njëjtin fakt dhe kundër të njejtit person, nëqoftëse më pas jepet autorizimi.

Ne jemi të mendimit se Prokuroria e Pargjithshme, në përmbushje të kompetencave të saj,  duhet ti shkojë deri në fund punës së nisur, duke shfrytëzuar të gjitha mundësitë ligjore për këtë qëllim. Neni 148 I Kushtetutës  sanksionon se “Prokuroria ushtron ndjekjen penale, si dhe përfaqëson akuzën në gjyq në emër të shtetit…” dhe këtë ajo duhet ta kryejë me objektivitet, bazuar në legjislacionin në fuqi, pa patur të drejtë të bëjë seleksionime subjektive për asnjë person, qoftë ky edhe deputet.

             Duke patur parasysh faktin se tragjedia e Gërdecit, që u shoqërua me viktima të shumta në njerëz dhe me dëme të mëdha materiale, përbën një arësye të fortë për të tërhequr vëmëndjen e opinionit të gjerë, brenda e jashtë vendit, jo vetëm për faktin e ndodhur  por dhe për ngarkimin me përgjegjësi penale të fajtorëve. Për këtë arsye qytetarët dhe mbarë opinioni pyesin, cili është shkaku që prokuroria vazhdon të heshtë? Ata janë veçanërisht të interesuar të dinë se çfarë e pengon Prokurorinë e Përgjithshme t’I drejtohet Kuvendit për të kërkuar autorizim të ri për ndjekjen penale të z. Fatmir Mediu, aq më tepër kur, jo vetëm z.Mediu dhe avokatët e tij janë shprehur për vazhdimin e gjykimit, meqë kjo ishte “në interesin e tyre” (në seancën gjyqësore të 14 shkurtit 2009 pranë Gj.L.) por edhe mazhoranca qeverisëse ka deklaruar, me se njëherë, gatishmërinë e saj për të miratuar çdo kërkesë të re të prokurorisë për dhënien e autorizimit për këtë ndjekje penale.

KShH thekson faktin se një çështje e tillë ka tërhequr edhe vëmendjen e ndërkombëtareve, të cilët I janë referuar asaj në vazhdimësi që nga koha e ngjarjes. Në raportin e fundit të DASH, lidhur me respektimin e të drejtave të njeriut në vendin tonë, nuk lihet pa përmednur edhe çështja “Mediu”.

Janë pikërisht arsyet e përmendura më lart që e bëjnë KShH-në të prononcohet publikisht dhe t’i sugjerojë Prokurores së Përgjithshme që në format dhe mënyrat që ajo do t’i çmojë të përshtatshme, në kuadrin e transparencës dhe interesit të opinionit publik të sqarojë pozicionimin ligjor të organit që drejton lidhur me çështjen e mësipërme.

Vetëm një proces i rregullt ligjor dhe një vendim i formës së prerë të gjykatës përkatëse do të vërtetonte fajësinë ose pafajesine e çdo të akuzuari përfshi këtu edhe ato ndaj z.Fatmir Mediu.