Deklaratë për shtyp e Komitetit Shqiptar të Helsinkit

Të nderuar kolegë,

Në gusht të vitit 2004, ekzekutohet në mes të lokalit, në qendër të kryeqytetit Grek (Athinë), një emigrant shqiptar, i ndjeri Luan Bërdëllima. I vëllai i tij, dëshmimtar okular, akuzoi një polic si autor të krimit.

Rasti është përfaqësuar ne shtetin Grek nga Observatori Grek i Traktatit të Helsinkit (OGTH), i cili përcjell në deklaratën bashkëlidhur disa nga shkeljet flagrante të konstatuara në procesin gjyqësor të zhvilluar në Greqi si: zvarritjet procedurale dhe mangësitë në zhvillimin e hetimeve, përjashtimi i të afërmve të viktimës si paditës civilë në procesin penal, mosdënimi i fajtorëve, cënimi i së drejtës për t’u informuar me vendimet gjyqësore duke u privuar nga e drejta e apelimit në Gjykatën e Lartë etj. Observatori Grek për Traktatin e Helsinkit ka paraqitur një kërkesë në Gjykatën Evropiane të të Drejtave të Njeriut në Strasburg lidhur me shkeljet e pretenduara për këtë rast.

Komiteti Shqiptar i Helsinkit (KShH) ka bashkëpunuar me homologun e tij, Observatorin Grek të Traktatit të Helsinkit për të krijuar të gjitha lehtësitë e nevojshme në zhvillimin e atyre procedurave në shtetin Grek, për të cilat kërkohej dokumentacioni i disponuar nga familjarët e viktimës ne Shqiperi si dhe ka mbajtur në kontakt të vazhdueshëm familjarët me OGTH, sa i takon ecurisë se çështjes. Komiteti Shqiptar i Helsinkit ka bërë me dije opinionin publik shqiptar edhe më parë për këtë rast. KShH sensibilizohet me të gjitha padrejtësitë dhe shkeljet e bëra prezent nga OGTH në deklaratën e tij bashkëlidhur.

Me konsideratë,

Komiteti Shqiptar i Helsinkit

Komedi e drejtësisë: Lirimi "ne fshehtësi" i policit akuzuar për vrasjen e emigrantit shqiptar!