Një akt brutal që duhet ndëshkuar

28.05.2010 

Komiteti Shqiptar i Helsinkit, nëpërmjet mediave, u njoh me nje ngjarje të shëmtuar dhune në dëm të arkitektit, artistit dhe shkrimtarit   Z.Maks Velo.

Nga informacioni i ofruar rezulton se ushtrimi i dhunës u krye nga një person që zhvillon veprimtari ndërtuese në Tiranë, i cili nuk është mjaftuar vetëm të dhunojë fizikisht, në mëyrë të paramenduar, Z.Velo por edhe e ka kanosur atë për jetën.

Dhuna, me sa duket, është ushtruar si një kundërpërgjigje ndaj një shkrimi të Z.Velo, të botuar në gazetën “Shekulli”, kohë më pare. Dhunuesi në këtë rast kërkon të intimidojnë persona me kurajo civile si Z.Velo, i cili siç është e njohur për mbarë opinionin shoqëror, nuk ka hezituar të thotë fjalën e tij, si profesionist me integritet, lidhur me çështje të artit, ndërtimit, arkitekturës, etj. Dhunuesi veprimin e tij ia ka drejtuar edhe gjithë shtetasve të tjerë, që mendojnë e veprojnë si Z. Velo, sa here që konstatojnë se cenohet interesi publik.

Veprimet e mësipërme përbëjnë një sjellje të kundraligjshme, së pari, sepse cenojnë integritetin fizik të një shtetasi dhe së dyti, janë një tentativë për të ndalur ushtrimin e të drejtës së lirisë së shprehjes.

Në takimin që patëm me Z. Velo ne i sugjeruam atij ndjekjen e çështjes në rrugë ligjore, duke i ofruar dhe asistencën tone. Ai hezitoi per shkak të mosbesimit të tij ndaj organeve të drejtësisë. Me keqardhje konstatojmë se raste të tilla ngurimi nga shtetasit, kohët e fundit, nuk janë të pakta.

KShH i bën thirrje gjithë opinionit shoqëror për t’u bashkuar me reagimet e shumta ndaj një sjellje të tillë, e cila nuk i shkon për shtat synimeve tona, mbarë kombëtare, për  një shoqëri demokratike e me të drejta njerëzore. Heshtja është me pasoja për të gjithë, për sot dhe për të ardhmen tonë.