Zgjedhjet e ardhshme në udhëkryq

 

21.07.2006

Duke u mbështetur në faktin se sipas pikës 8 të nenit 7 të Kodit Zgjedhor “Zgjedhjet për organet e qeverisjes vendore zhvillohen 60 deri 30 ditë para mbarimit të mandatit të organeve vendore ekzistuese…” dhe duke patur parasysh mbarimin e mandatit të tyre, zgjedhjet për organet e qeverisjes vendore duhet të zhvillohen gjatë periudhës 20 dhjetor 2006-20 Janar 2007.

 

Komiteti Shqiptar i Helsinkit vëren me shqetësim se:

• Komisioni parlamentar i ngritur posaçërisht për reformën zgjedhore rezulton të ketë mbetur një strukturë formale. Nuk është hedhur asnjë hap përpara në diskutimin e çështjeve për zgjidhjen e të cilave ai është krjuar me vendim të Kuvendit të Shqipërisë.

• Ende nuk është marrë në shqyrtim asnjë rekomandim i OSBE/ODIHR-it për përmirësime në Kodin Zgjedhor.

• Megjithëse kanë kaluar afatet ligjore, institucionet kushtetuese ende po vonojnë në plotësimin e vendeve vankante në KQZ.

Konstatohet se kjo situatë e krijuar është pasojë e mungesës së vullnetit të dy forcave më të mëdha parlamentare për të gjetur konsensusin e nevojshëm për realizimin e reformës zgjedhore.

 

Komiteti Shqiptar i Helsinkit e konsideron këtë gjendje tepër serioze dhe mjaft shqetësuese. Për shkak të këtyre vonesave të patolerueshme po vihet në pikëpyetje zhvillimi i zgjedhjeve brenda afateve ligjore duke rrezikuar garantimin e zhvillimit të tyre sipas standardeve ndërkombëtare të lira, të ndershme, demokratike dhe të pakontestuara.  

 

Gjendja bëhet edhe më shqetësuese po të mbahet parasysh se së shpejti, sipas parashikimeve kushtetuese, punimet e Kuvendit ndërpriten për filluar në ditët e para të muajit shtator 2006. KSHH vëren se mes dy partive të mëdha parlamentare nuk janë dhënë sinjale pozitive për zhvillimin e një dialogu konstruktiv me synim kapërcimin e kësaj situate, pasojat e së cilës mund të kenë një ndikim negativ në procesin e ratifikimit të Marrëveshjes së Asociim-Stabilizimit nga vendet anëtare të Bashimit Evropian.

 

Ndër të tjera, kjo vonesë e theksuar e bën të pamundur respektimin e afateve ligjore që përcakton Kodi Zgjedhor lidhur me përgatitjen dhe shpalljen e listave të zgjedhësve, ngritjen e KZQV-ve, etj.

 

KSHH është i shqetësuar për faktin se mosmarrja parasysh e rekomandimeve të OSBE/ODIHR-it, mund të krijojë terren për lindjen e pakënaqësive dhe kontestimeve gjatë procesit zgjedhor ose për rezultatin e tyre nga njëra ose tjetra  palë politike.

 

Sa më sipër KSHH:

• I bën thirrje të gjitha partive politike, kryesisht dy partive më të mëdha, për të arritur në një kompromis për zgjidhjen me konsensus të çështjeve të ngritura apo të kontestuara.

• I drejtohet Presidentit të Republikës që në funksion të kompetencave të tij kushtetuese, të ndikojë në kapërcimin e menjëhershëm të kësaj gjendjeje, duke u kërkuar njëkohësisht institucioneve kushtetuese të përmbushin pa vonesa të mëtejshme detyrimin ligjor për plotësimin e vendeve vakante në KQZ.

• I sugjeron Prezencës së OSBE-së në Tiranë që në përputhje me misionin e saj, të nxisë frymën e një diskutimi konstruktiv mes palëve duke synuar realizimin e reformës zgjedhore në përputhje me standardet ndërkombëtare dhe rekomandimet e OSBE/ODIHR-it.