Trajnohen trajnerë shqiptarë të administratës së burgjeve[1]

22.09.2006
Në kuadër të mbështetjes së administratës së burgjeve dhe kontribuimit në rritjen e kapaciteteve profesionale të tyre, KSHH në datat 11-14 Shtator 2006, organizoi në ambjentet e Hotel Doros, aktivitetin “Trajnim trajnerësh”[2]. Qëllimi i aktivitetit ishte krijimi i një grupi trajnerësh lokalë shqiptarë që do të shërbejnë për trajnimin e administratës së burgjeve në të ardhmen si edhe përgatitja e një programi mësimor për katër tema kryesore përkatësisht komunikimi, të dënuarit në pozita të dobëta, siguria dhe kontaktet me botën e jashtme. Në grupin e trajnerëve shqiptarë merrnin pjesë 12 specialistë të sektorit të edukimit nga Drejtoria e Përgjithshme e Burgjeve, nga pothuajse të gjitha burgjet shqiptare dhe nga Qendra e Trajnimit të Administratës së Burgjeve. Trajnimi u krye nga tre ekspertë të huaj me përvojë të pasur në fushën e sistemit penitenciar si edhe në trajnimin e administratës së burgjeve përkatësisht Z. Jan van den Brand[3], Z. Stef van de Lande[4] dhe Znj. Monique Lejenue[5].

Lidhur me temat e programit mësimor nga të pranishmit u theksua se për të garantuar respektimin e të drejtave dhe lirive themelore të të dënuarve është e nevojshme ekzistenca e një bashkëpunimi dhe komunikimi të hapur ndërmjet të gjithë stafit në burg. Në këtë drejtim, komunikimi si një element shumë i rëndësishëm i punës në burgje u pa në disa këndvështrime sipas sektorëve, ndërmjet vetë personelit sipas hierarkisë, ndërmjet personelit dhe të dënuarve si edhe komunikimi i jashtëm ndërinstitucional. Gjithashtu, një vlerë e rëndësishme dhe praktike iu dha edhe kontakteve me botën e jashtme ku përfshihen aktorë të ndryshëm të shoqërisë civile si të afërmit e të dënuarve, avokatët, organizatat e të drejtave të njeriut, media, shoqatat besimtare etj. Një tjetër temë shumë aktuale dhe me vlerë për institucionet penitenciare ishte siguria e institucionit dhe e të dënuarve e cila u vlerësua si siguri fizike dhe dinamike. Lidhur me temën e të dënuarve në pozita të dobëta, pjesëmarrësit identifikuan kategoritë e ndryshme të dënuarve që përfshihen në këtë grup si edhe rëndësinë e trajtimit të veçantë të tyre nga i gjithë stafi i burgut. 

Trajnimi pati vlera të rëndësishme për pjesëmarrësit pasi nuk ishte vetëm në aspektin teorik, por dhe atë praktik. Gjithashtu, rëndësia e trajnimit qëndron dhe në përzgjedhjen e duhur të temave të programit mësimor të cilat ishin aktuale, të pranishme në situatën e burgjeve shqiptare si edhe shumë të nevojshme për t’iu transmetuar në të ardhmen nivelit bazë të personelit në burgje nga ana e grupit të trajnerëve të përgatitur. Pjesëmarrësit u ndanë në grupe pune dhe u angazhuan për kryerjen e disa detyrave të caktuara lidhur me temat e programit mësimor. Në përfundim të trajnimit, pjesëmarrësit organizuan një model trajnimi në një teme të caktuar nga programi mësimor.

Pjesëmarrësit e vlerësuan trajnimin shumë të rëndësishëm për vlerat teorike dhe praktike të temave të trajtuara, për përfshirjen aktive të tyre në dhënien e konkluzioneve dhe mendimeve për zgjidhjen e situatave problematike në përputhje me vetë nevojat dhe situatën konkrete të sistemit penitenciar në Shqipëri. Gjithashtu, pjesëmarrësit vlerësuan dhënien e njohurive të vlefshme në temat kryesore përmes shkëmbimit të përvojave me ekspertët e huaj si edhe në përdorimin e metodave efikase për realizimin e tyre.

Nga të gjithë të pranishmit në aktivitet u shpreh e nevojshme domosdoshmëria e trajnimeve në fusha të tilla. Një tjetër aspekt që u theksua nga të pranishmit ishte rëndësia e vazhdimit të këtij procesi si edhe transmetimi i kësaj përvoje stafit të nivelit bazë në burgjet konkrete. Eficenca e trajnimit i atribuohet sipas pjesëmarrësve dhe thjeshtësisë së informacionit, komunikimit të hapur ndërmjet tyre, aktivizimit dhe zbatimit në mënyrë praktike të njohurive të marra. Në përfundim të kurorëzimit me sukses të trajnimit, znj. Vasilika Hysi, drejtore ekzekutive e KSHH-së dhe z. Sajmir Shehri, Drejtor i Përgjithshëm i Burgjeve u shpërndanë çertifikata pjesëmarrësve.