Monitorim në pikat kryesore të kalimit kufitar me Malin e Zi, në Pikën e Kalimit Kufitar Hani i Hotit (Malësi e Madhe ), Muriqan ( Shkodër) dhe në Portin e Shëngjinit (Lezhë)

 

24.01.2007

Në kuadër të projektit “Mbi respektimin e të drejtave të emigrantëve dhe të personave të kthyer”,në datat 18-19 janar 2007 u organizua një tur vëzhgimi në pikat kryesore të kalimit kufitar me Malin e Zi, përkatësisht në Pikën e Kalimit Kufitar Hani i Hotit (Malësi e Madhe ), Muriqan ( Shkodër) dhe në Portin e Shëngjinit (Lezhë).

Në Pikën e Kalimit Kufitar të Hanit të Hotit u zhvillua një takim me Komandanti e kësaj pike. Përsa i përket infrastrukturës, kjo pikë kishte infrastrukturën më të mirë. Në këtë pikë kishte hapësirë të mjaftueshmë për trajtimin e shtetasve të ndryshëm që kalonin kufirin legalisht si dhe për intervistimin e personave të kthyer nga policia malazeze. Në këtë pikë kishte dhe tualete të përshtatshme brenda terminalit. Përsa i përket transportit në dispozicion të kësaj pike ishte një furgon që shërbente për transportimin e personave të kthyer. Në rast se kishte më shumë njerëz i sjellin nga Shkodra furgona të tjerë shtesë.

 

Në pikën kufitare ka personel femër,ka ambjente të përshtatshme për intervistimin e personave. Maksimumi i vonesave për verifikim ka qënë rreth 2-3 orë.

Në përgjithësi personat që ktheheshin janë persona që kalojnë nga Kukësi legalisht, vazhdojnë në Kosovë, Serbi dhe Kroaci. Shifrat e përgjithshme të personave të kthyer ishin rreth 100 persona në muaj.

 

Në Kroaci ata mbahen në burg dhe në disa raste keqtrajtohen. Në Kroaci ata dënohen për kalim të paligjshëm të kufirit.Autoritetet kroate i mbajnë rreth 2 javë deri në 1 muaj në burg dhe i sekuestrojnë cdo gjë që kanë me vete. E njëjta situatë ishte dhe kur ata kapeshin nga policia serbe, e cila i keqtrajtonte dhe i sekuestronte cdo gjë që kishin me vete. 

Të kthyerit vijnë të gjithë pa para dhe ndihmohen me sa munden nga policia shqiptare. Përgjithësisht janë nga veriu personat që kthehen. Policia malazeze nuk i keqtrajton emigrantët, ata i tranzitojnë për në Shqipëri sapo i marrin në dorëzim nga autoritetet kroate.

 

Shqetësues ishte fakti që pothuajse të gjithë të kthyerit nuk bashkëpunonin me autoritetet policore për të dhënë informacion mbi rrugët e kalimit, personat që i ndihmonin për tu trafikuar etj.

Në pikën e kalimit kufitar të Muriqanit u zhvillua takim me komandantin e pikës kufitare.Në këtë pikë kufitare nuk silleshin nga policia malazeze personat e kthyer,sipas një marrëveshjeje të bërë që kjo kategori personash të trajtoheshin vetëm në pikën e Hanit të Hotit. Përmendej vetëm një rast vitin e kaluar ka qënë vetem një grup prej 12 vetësh.

 

Kushtet në këtë pikë ishin modeste, por së fundmi ishte shtuar një kabinë ku ishin instaluar kompjuterat e sistemit TIMS.

Pritej që kjo pikë të shndërrohej në një pikë moderne kufitare,pas marrëveshjes dypalëshe mes Shqipërisë dhe Malit të Zi të firmosur mes dy Ministrave të Brendshëm pak ditë më parë. Në bazë të kësaj marrëveshjeje do të sillej risia e koordinimit të punës me staf të përbashkët policor në një ndërtesë të vetme. Parashikohej që së shpejti kjo pikë të kishte dhe transport mallrash.

 

Në portin e Shëngjinit u zhvillua një takim me komandantin e policisë kufitare të portit. Në këtë port nuk kishte trafik personash. Linja e shumëpremtuar e trageteve me Italinë nuk ishte vënë në funksionim, dhe ky port funksiononte vetëm si port mallrash.

Infrastuktura ishte shumë e mirë, së fundmi ishte inauguruar ndërtesa e komisariatit të policisë së portit, dhuratë nga KE, si dhe ishin bërë punime restauruese në Pikën e Policisë kufitare. Në këtë ndërtesë ishin krijuar mjedise komode për pritjen dhe trajtimin e azilkërkuesve, viktimave të trafikut, të kthyerve etj. Pritej që në këtë port të bëheshin investime për të rritur thellësine e basenit të trageteve.