Komiteti Shqiptar i Helsinkit fillon projektin një vjeçar të monitorimit të respektimit të të drejtave të emigrantëve shqiptarë dhe të personave të kthyer

 

24.07.2006

Komiteti Shqiptar i Helsinkit (KShH-ja) vëzhgon respektimin e të drejtave dhe lirive të njeriut dhe reagon për rivënien e tyre në vend; sensibilizon shtetasit për mbrojtjen e të drejtave dhe të lirive të tyre; ndihmon në përmirësimin e legjislacionit dhe të praktikës për zbatimin e ligjit nëpërmjet oponencave e rekomandimeve gjatë hartimit dhe më pas në zbatimit e tij. Misioni i KShH-së përfshin edhe respektimin e të drejtave të emigrantëve shqiptare kudo që ata ndodhen.

KShH–ja në bashkëpunim me Monitoruesin Grek të Helsinkit edhe më parë kanë monitoruar dhe verifikuar respektimin e shkeljeve të të drejtave të emigrantëve shqiptarë, veçanërisht në kufirin Shqipëri – Greqi.

Duke filluar nga muaji qershor 2006, KShH-ja ka filluar zbatimin e një projekti një vjeçar për vëzhgimin e respektimit të të drejtave të emigrantëve shqiptarë dhe të personave të kthyer, sipas marrëveshjes së ripranimit.

Grupi synues i këtij projekti do të jenë qytetarët shqiptarë të kthyer nga vende të tjera në Shqipëri, respektimi i të drejtave të tyre, evidentimi i rasteve të shkeljeve të të drejtave të tyre nga autoritetet shtetërore shqiptare kufitare dhe atyre të vendeve fqinje, ose nga struktura të tjera shtetërore në Shqipëri dhe jashtë saj.

 

Disa nga objektivat kryesorë të projektit do të jenë:

• Mbrojtja e të drejtave të emigrantëve shqiptarë dhe personave të kthyer në kuadrin e   marrëveshjes së ripranimit;

• Vëzhgimi i të drejtave të emigrantëve shqiptarë nga autoritetet shtetërore shqiptare sidomos ato kufitare;

• Bashkëpunimi me median shqiptare përsa i përket çështjeve të informimit dhe trajtimit të çështjeve në fushën e emigrimit dhe respektimit të të drejtave të shtetasve shqiptarë;

• Të kontrubuojmë në vëzhgimin e të drejtave të emigrantëve në Shqipëri dhe jashtë saj dhe në trajtimin e  tyre në përputhje me standartet ndërkombëtare.

Projekti në shumën 46990 Euro mundësohet me mbështetjen financiare të Komitetit Norvegjez të Helsinkit dhe do të zbatohet në bashkëpunim të ngushtë me aktorët kryesorë në këtë fushë dhe me organizatat simotra në vendet e tjera, sidomos me Monitoruesin Grek të Helsinkit dhe organizatat e emigrantëve jashtë vendit.