PROMOVIMI I DOKUMENTARIT

“Të ndihesh i barabartë” – Në Greqi mes emigrantëve 

 

Në kuadër të misionit sensibilizues për të drejtat e njeriut, në datën 11 Maj 2006 Komiteti Shqiptar i Helsinkit organizoi shfaqjen për herë të parë të filmit dokumentar “Të ndihesh i barabartë – Në Greqi mes emigrantëve”, prodhim i KShH-së dhe Art Studio Grishaj.

 

Filmi dokumentar trajton jetën e emigrantëve shqiptarë në shtetin grek, përpjekjet e tyre për t’u integruar në shoqërinë greke, vështirësitë që hasin, përvojat pozitive të integrimit të tyre, përpjekjet që ata bëjnë për të realizuar të drejtat e tyre. Ai është realizuar mbi bazën e intervistave me emigrantë shqiptarë dhe qytetarë grekë. Intervistat prekin probleme të ndryshme të emigrantëve shqiptarë që jetojnë në Greqi që kanë të bëjnë me punësimin, shkollimin e tyre, trajtimin nga popullsia greke. Nuk mbetet pa u prekur edhe trajtimi i shqiptarëve nga policia Greke në Kufi.

 

Në këtë film, qytetarë grekë shprehin vlerësimin e tyre për emigrantët shqiptarë. Një vend të veçantë në film zënë puna dhe përpjekjet e organizatave të të drejtave të njeriut në Greqi dhe në Shqipëri, kryesisht të shoqatave të emigrantëve shqiptarë dhe Komitetit Shqiptar të Helsinkit. Dokumentari synon të përcjellë frymën optimiste për një jetë dhe respektim më të mirë të të drejtave të njeriut.

 

“Nesër do të jetë një ditë e re me shpresën dhe urimin që njerëzit të çdo kombësie e të çdo ngjyre të jenë më afër njëri tjetrit, me të përbashkëtën e të qënit NJERI dhe të ndjerit të barabartë” (Citat nga skenari i dokumentarit “Të ndihesh i barabartë”) 

 

Në këtë aktivitet ishin të ftuar përfaqësues të lartë të institucioneve shtetërore, ambasadave të akredituara në Tiranë, organizatave jo-fitiprurëse shqiptare dhe ndërkombëtare, etj.

 

KSHH-ja përfiton nga rasti të falenderojë grupin realizues të filmit, regjizorin e mirënjohur Z. Ylli Pepo dhe Komitetin Norvegjez të Helsinkit për mbështetjen financiare të dhënë.