Veprimtari në mbrojtje të shtresave në nevojë 

 

Në kuadër të mbrojtjes më të mirë të të drejtave të shtetasve që jetojnë me HIV/AIDS dhe të bashkëpunimit mes organizatave vendase, Komiteti Shqiptar i Helsinkit ka nisur  në vitin 2005 bashkëpunimin me shoqatën shqiptare PLWHA (Persons Living With Hiv/Aids), Institutin e Shëndetit Publik, Klinikën e Sëmundjeve Infektive në Qendrën Universitare të Spitalit “Nënë Tereza” për realizimin e disa aktiviteteve të përbashkëta. Në këtë kuadër janë realizuar aktivitete të cilat kanë patur si qëllim kryesor ndërgjegjësimin e grupeve të riskuara ose që jetojnë me HIV/AIDS për të drejtat e tyre.

 

Më 23 Maj 2005, u organizua seminari “Parandalimi i HIV/AIDS/STI në burgje” me gra dhe vajza të cilat vuajnë dënimin me burgim. Qëllimi i seminarit ishte rritja e nivelit të informacionit të këtij grupi për çështje që lidhen me HIV/AIDS dhe problemet e kësaj kategorie në kushtet  e privimit të lirisë dhe vuajtjes së dënimit. Seminari u fokusua kryesisht në mënyrën e transmetimit të HIV-it dhe masat mbrojtëse, testimi, këshillimet paraprake për të sëmurët, statusi social i personave të sëmurë me HIV dhe reagimet e komunitetit ndaj këtyre personave.  Në seminar merrnin pjesë shoqata shqiptare PLWHA, Komiteti Shqiptar i Helsinkit, Instituti i Shëndetit Publik dhe doktorë të cilët punojnë në Departamentin e Sëmundjeve Infektive.  

 

Më 27 Maj 2005, u organizua seminari “Statusi Social i grave në shoqërinë shqiptare and sfidat e ardhshme” me studentë të Fakultetit  të Shkencave Sociale. Qëllimi i tij ishte rritja e nivelit të informacionit për problemet e grave të infektuara me HIV, roli i psikologut dhe i punonjësve socialë për trajtimin e personave të sëmurë me HIV dhe lufta kundër stigmatizimit dhe diskriminimit të tyre. Një objektiv tjetër i takimit ishte rritja e nivelit të informacionit mbi çështje mjekësore që kanë të bëjnë me transmetimin e virusit HIV dhe problemet e shkaktuara në trupin e njeriut. Në takim, morën pjesë shoqata shqiptare PLWHA, Komiteti Shqiptar i Helsinkit, programi kombëtar HIV/AIDS dhe doktorë për sëmundjet infektive. Një ekspert i KSHH-së trajtoi problemet e të drejtave të shtetasve me HIV/AIDSdhe detyrimet e institucioneve shtetëropre dhe shërbimeve sociale.

 

Më 20 Qershor 2005 u organizua seminar me vajza të trafikuara që qëndronin në strehëzat e IOM-it,  me temë “HIV/AIDS dhe trafikimi i qenieve njerëzoren-nevojë për ndërgjegjen tonë”. Qëllimi i këtij aktiviteti ishte informimi i këtij grupi për problemet që kanë të bëjnë me HIV, mënyrat e transmetimit, masat mbrojtëse, rëndësia e testimit pas kthimit në Shqipëri, etj. Në takim morën pjesë shoqata shqiptare PLWHA, Komiteti Shqiptar i Helsinkit, përfaqësues nga zyra e IOM-it, etj.  

 

Më 21 Nëntor 2005, në bashkëpunim me KSHH-në, Institutin e Shëndetit Publik dhe Departamentin e Sëmundjeve Infektive u organizua seminar me studentë të Fakultetit të Drejtësisë me temë “Të drejtat e grave-në kuadër të të drejtave të njeriut në Shqipëri”. Qëllimi i takimit ishte adresimi i problemeve të grave të infektuara me HIV nga pikëpamja e dhunimit të të drejtave të njeriut.

 

Në datat 2-4 shkurt 2006, Instituti i Shëndetit Publik organizoi një trajnim për Shëndetin dhe të drejtat e Njeriut. Qëllimi i seminarit trajnues ishte krijimi i një grupi i cili do të vëzhgojë shëndetin dhe të drejtat e njeriut në Shqipëri, pjesë e të cilit do të jetë edhe KSHH. Në këtë seminar u shpreh ideja e bashkimit me lëvizjen botërore për shëndetin dhe të drejtat e njeriut.