Informacion mbi  fillimin e zbatimit të projektit të ri “Monitorimi i respektimit të të drejtave të minoriteteve në bashkinë e Korçës” 3-4 maj 2006

 

Në datën 4 maj 2006, Komiteti Shqiptar  i Helsinkit (KSHH) organizoi një aktivitet për të promovuar fillimin e zbatimit të projektit të ri “Monitorimi i respektimit të të drejtave të minoriteteve në bashkinë e Korçës” në qytetin e Korçës. Në kuadër të promovimit të projektit, përfaqësues të KSHH-së organizuan një takim me këshillin bashkiak të Bashkisë Korçë. Në takim u prezantuan objektivat e projektit dhe veprimtaritë që do të zhvillohen në kuadër të tij. Nëpërmjet projektit synohet të evidentohet shkalla e pjesëmarrjes së përfaqësuesve të minoriteteve në vendimmarrje, mundësitë e rritjes së përfaqësimit dhe gjetja e mekanizmave për të realizuar këtë synim.

 

Këshilli bashkiak i rrethit Korçë shprehu angazhimin dhe mbështetjen e tij për zbatimin e projektit në bashkinë e Korçës. Në takimin ishte e pranishme edhe media lokale e Korçës. Në këtë kuadër ishte përgatitur edhe një njoftim për shtyp, i cili iu shpërnda medias në fund të takimit.  

 

Me rastin e promovimit të projektit, u realizua një emision televiziv në TV “Lobi”, një nga televizionet kryesore lokale të Korçës. Të pranishëm në këtë emision ishin përfaqësues të KSHH-së dhe kryetari i Këshillit Bashkiak Korçë. Qëllimi i emisionit ishte rritja e ndërgjegjësimit të qytetarëve korçarë për të patur një pjesëmarrje më të mirë në zbatimin e këtij projekti dhe të tregonte rëndësinë e gjithpërfshirjes së tyre në këtë proces.