Integrimi i Shqipërisë dhe shoqëria civile  Emigrantët  Media  Zgjedhjet  Të miturit  Minoritetet  Policia  Edukimi ligjor  Shërbimi ligjor  Burgjet dhe vendet e paraburgimit  Shëndeti dhe të drejtat e njeriut  Ekzekutimi i vendimeve gjyqësore  Letra të KSHH  Informacione të tjera  PROJEKTE  RAPORTE  DEKLARATA

   ZGJEDHJET PARLAMENTARE

STRATEGJIA 2007-2010

  TAKIME KESHILLIMORE

Lufta kundër korrupsionit dhe nepotizmit nuk legjitimohet duke shkelur Kushtetuten dhe të drejtat e njeriut

Tiranë, më 13/02/2006

Në datën 10 shkurt 2006, Avokati i Popullit, Komiteti Shqiptar i Helsinkit, Grupi Shqiptar për të Drejtat e Njeriut dhe Qendra e Studimeve Parlamentare, si një Aleancë për të Drejtat Njeriut i dërguan Gjykatës Kushtetuese kërkesën me objekt: shfuqizimin e tre vendimeve të Këshillit të Ministrave me nr. 43 , 44 dhe 48 te dates 27.01.2006, duke konsideruar se ato cënojnë të drejtat themelore të njeriut, duke mos respektuar parimet kushtetuese.

Para miratimit të këtyre vendimeve, KSHH-ja reagoi me nje deklaratë për shtyp nëpërmjet së cilës i sugjeronte qeverisë të mos miratonte vendimet, sepse ato vinin në kundërshtim me Kushtetutën e Republikes se Shqiperise, por kjo nuk u mor parasysh.

Në termat e kontrollit dhe balancës së pushteteve, organizmat e Shoqërisë Civile dhe Institucionet Kushtetuese që veprojnë në fushën e mbrojtjes së të drejtave të njeriut nuk mund të qëndrojnë indiferente dhe ta reduktojnë identitetin e tyre thjesht në dekoracion institucional të pushtetit.

Ne jemi rojtarë publikë të të drejtave dhe lirive themelore të njeriut në Shqipëri, prandaj nuk mund të qendrojmë vetëm në fushën e deklaratave, kështu që vendosëm të përdorim të gjitha rrugët institucionale që na lejon Kushtetuta e Republikës së Shqipërisë. Të paditësh Qeverinë në Gjykatën Kushtetuese nuk do të thotë se i kundërvihesh qëllimeve të saj të mira për luftën kundër korrupsionit dhe nepotizmit në administratën publike shqiptare. Ne kemi kërkuar që kjo “luftë apo reformë” të jetë brenda kornizave të njohura të respektimit të të drejtave dhe lirive themelore të njeriut, të njohura nga Kushtetuta shqiptare dhe aktet ndërkombëtare.

Argumenti kryesor që paraqitet në kërkesën tonë për shpalljen si antikushtetuese të vendimeve të mësipërme është fakti se sipas nenit 17 të Kushtetutës së Republikës së Shqipërisë, organi kompetent për të vendosur kufizimin e të drejtave të shtetasve të parashikuara në Kushtetutë, është Kuvendi. Në këtë nen thuhet se kufizimi i këtyre të drejtave vendoset vetëm me ligj. Kjo do të thotë se Këshilli i Ministrave nuk ka të drejtë të marrë vendime të tilla qe jane te paligjshme, sepse Qeveria ka marre kompetencat e Parlamentit, dhe si te tilla ato jane automatikisht antikushtetuese.

Lufta kunder korrupsionit dhe konfliktit te interesave nuk mund te legjitimohet me akte nenligjore, te cilat krijojne hapesira per nje zbatim selektiv dhe joproporcional, qe do te komprometonte edhe vete qellimin e lavderueshem, per te cilin ato jane nxjerre.

Këto vendime shkelin parimin kushtetues të garancive ligjore të nëpunësve, që mbrohen me ligj, dhe janë në shkelje të ligjit “Për statusin e nëpunësit civil” dhe Kodin e Punës. Këto janë shkaqe që duhen patur parasysh para fillimit të marrëdhënieve të punës dhe kurrësesi nuk mund t’u jepet fuqi prapavepruese.

Sipas mendimit tonë, këto vendime cënojnë edhe parimet Kushtetuese të barazisë para ligjit dhe atë të mosdiskriminimit. Vendimet e Këshillit të Ministrave cënojnë gjithashtu edhe të drejtën e shtetasve për punësim dhe garanci për profesionin dhe karrierën e tyre. Këto vendime bien ndesh edhe me Konventën Evropiane për të  Drejtat  Njeriut.

Përveç sa më siper, ndodhemi në kushtet e një procesi vendimmarrës, duke anashkaluar Kushtetutën dhe pa u konsultuar edhe me grupet e interesuara, shoqërinë civile dhe institucionet e të drejtave të njeriut për të ofruar oponencë për mirëqeverisje përmes ligjeve.

Nënshkruajnë dekaratën për shtyp:

Prof.as.dr. Vasilika HYSI                                           Prof.as.dr.Ermir Dobjani

Drejtore Ekzekutive                                                      Avokati i Popullit                     

Komiteti Shqiptar i Helsinkit

Elsa Ballauri                                                               Sokol Berberi

Drejtore Ekzekutive                                                      Drejtor Ekzekutiv

Grupi Shqiptar për të Drejtat e Njeriut              Qendra e Studimeve Parlamentare