Integrimi i Shqipërisë dhe shoqëria civile  Emigrantët  Media  Zgjedhjet  Të miturit  Minoritetet  Policia  Edukimi ligjor  Shërbimi ligjor  Burgjet dhe vendet e paraburgimit  Shëndeti dhe të drejtat e njeriut  Ekzekutimi i vendimeve gjyqësore  Letra të KSHH  Informacione të tjera  PROJEKTE  RAPORTE  DEKLARATA

   ZGJEDHJET PARLAMENTARE

STRATEGJIA 2007-2010

  TAKIME KESHILLIMORE

Mungesa e respektimit të të drejtave të sëmurëve mendorë në burgun e Krujës

Tiranë, më 6 Mars 2006

Në kuadër të një raundi vëzhgimesh të ndërmarra nga Komiteti Shqiptar i Helsinkit, më datë 28 Shkurt 2006, një grup ekspertësh të KSHH-së realizuan një vëzhgim në Institucionin e Ekzekutimit të Dënimeve Penale Krujë. Qëllimi i vëzhgimit ishte respektimin e të drejtave të personave që vuajnë dënimin në këtë institucion dhe në veçanti të dënuarve të sëmurë.

Gjatë vëzhgimit rezultoi se në burgun e Krujës mungonin totalisht medikamentet mjekësore për të dënuarit. Në këtë institucion ndodhen 52 të dënuar të sëmurë mendorë. Për këta të sëmurë mendorë mungonin të gjitha medikamentet për trajtimin e tyre. Gjithashtu, në këtë burg u evidentua dhe mungesa e një mjeku specialist psikiatër.

Vlen të përmendet se rasti konkret bie ndesh me ligjin nr.8328, datë 16.4.1998 “Për të drejtat dhe trajtimin e të dënuarve me burgim” i cili në nenin 26 të tij “Shërbimi shëndetësor” parashikon që “Shërbimi shëndetësor duhet të sigurojë furnizimin me ilaçe dhe pajisje mjekësore”.              

Gjithashtu trajtimi i të dënuarve të sëmurë në këtë institucion bie ndesh me nenin 22, pikën 1 të Dokumentit të Kombeve të Bashkuara “Tërësia e rregullave minimum për trajtimin e të burgosurve” i cili sanksionon  se “çdo institucion penitenciar duhet të ketë në dispozicion një mjek të kualifikuar, i cili të ketë njohuri në psikiatri” si dhe nenit 82, pika 2 dhe 3 e tij ku thuhet se “të burgosurit që vuajnë nga sëmundje ose të meta të tjera mendore duhet të ekzaminohen dhe të trajtohen në institucione te specializuara, të vendosura nën një drejtim mjekësor”. Gjatë kohës së qëndrimit të tyre në burg, këta persona duhet të jenë nën mbikqyrjen speciale të mjekut.

KSHH i sugjeron Ministrisë së Drejtësisë që në përputhje me ligjin, detyrat dhe kompetencat e tyre të trajtojë me seriozitet problemin në fjalë dhe të marrë masa të menjëhershme për t’i siguruar medikamentet të sëmurëve në burgun e Krujës dhe sidomos të sëmurëve mendorë dhe atyre të paralizuar stacionarë.