KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

MBIPOPULLIMI I DHOMAVE TË PARABURGIMIT

PROBLEM I MPREHTË PËR RUAJTJEN E RENDIT

10.04.2002 

KSHH më shumë se një herë ka denoncuar situatën që është krijuar në shumë komisariate të policisë ku mbahen ende persona të dënuar nga gjykata me vendim të formës së prerë. Në shtyp njoftohen herë pas here raste të arratisjes së këtyre personave. Kështu në Korrik 2001 janë arratisur 4 veta, kurse tani së fundi 9 Prill 2002 është arratisur një tjetër i dënuar me vendim të formës së prerë, autor i krimeve të rënda. Në shtyp jepet edhe një deklaratë që i atribuohet "njërit prej drejtuesve të lartë të Ministrisë së Rendit" sipas të cilit në qelitë e Komisariateve në shkallë vendi të burgosurit  me vendim të formës së prerë janë rreth 400.

Problemi i mbipopullimit në komisariatet e policisë duhet të shikohet në dy anë. Së pari, si një masë e domosdoshme për t'i prerë rrugën orvatjeve të çfarëdo të burgosuri për t'i shpëtuar drejtësisë. Së dyti, KSHH e ka shtruar çështjen edhe si një nevojë për t'i dhënë fund mbipopullimit në mjediset e policisë, për t'i vënë kështu të burgosurit në kushte normale sipas të gjitha rregullave që janë përcaktuar për të burgosurit në vendet e vuajtjes së dënimit.

Është e vërtetë se oragnet e rendit kanë marrë disa masa në këtë drejtim. Por kryesorja është parandalimi i rasteve të tilla, që po ndodhin mjaft shpesh. Problemi me përmasat që ka marrë duhet të tërheqë edhe vëmendjen e autoriteteve në nivel qeveritar për ta trajtuar çështjen si një problem shtetëror dhe për të mos e lënë atë vetëm në kompetencë të Ministrisë së Rendit dhe të Ministrisë së Drejtësisë.