Shkelje të rënda të të drejtave të shtetasve në komisariatet

e policisë së Fierit dhe të Krujës

Tiranë, më 11 dhjetor 2004

Gjatë periudhës 19-27 Nëntor 2004, grupe vëzhguesish të Komitetit Shqiptar të Helsinkit kryen disa vëzhgime në Komisariatet e Policisë të Fierit dhe të Krujës për të vëzhguar në vend respektimin e të drejtave të të paraburgosurve.  Nga kontaktet e marra me personelin e komisariateve si dhe me personat që mbahen në vendet e paraburgimit konstatohet se:

• Mbipopullimi i vendeve të paraburgimit vazhdon të jetë shqetësues. Ndërsa kapaciteti i vendeve në komisariatin e policisë së Fierit është 48 persona, nga vëzhgimi rezultoi se në dhomat e paraburgimit ndodheshin 114 persona; kurse në komisariatin e Krujës mbahen mbi kapacitet 13 persona.

• Si pasojë e mbipopullimit të dhomave të paraburgimit, ishin krijuar vështirësi lidhur me fjetjen dhe higjienën e personave në këto dhoma, me vendosjen e të miturve bashkë me të rriturit. Të paraburgosurit flinin në kushte të papërshtatshme, në tokë dhe në dyshekë të vjetëruar.

• Ekziston vetëm një banjë gjë që krijon vështirësi në kryerjen e nevojave personale dhe në mbajtjen e higjenës personale dhe të ambjentit.

• Në dy komisariatet e vëzhguara ka persona të dënuar me vendime të formës së prerë që vazhdojnë të mbahen në dhomat e paraburgimit, pavarësisht nga përpjekjet e bëra për transferimin e tyre në burgjet përkatëse.

• Mjediset e komisariatit të Krujës janë në një godinë e vjetër e ndërtuar që në vitin 1936; korridoret janë me lagështirë dhe të palyera.

• Shërbimi shëndetësor është gjithashtu i pakënaqshëm. Të paraburgosurit ankohen se vizitat dhe ndihma mjekësore u jepet me vonesë.

• Grupi i vëzhguesve mori takim me persona të paraburgosur në të dy komisariatet –objekt vëzhgimi. Pjesa më e madhe e të paraburgosurve të kontaktuar deklaruan se në kohën e ndalimit ose të arrestimit nuk vihen në dijeni për të drejtat që ata kanë sipas Kodit të Procedurës Penale. 

• Të paraburgosurit privohen nga disa të drejta që u njeh atyre ligji “Për të drejtat dhe trajtimin e të dënuarve me burgim” Në nenin 75 të këtij ligji thuhet se dispozitat e tij shtrihen edhe ndaj të paraburgosurve, me përjashtim të kufizimeve të përcaktuaras me ligj”.

• Për shkak të mbipopullimin të vendeve të paraburgimit, në disa raste janë kufizuar edhe takimet e të paraburgosurve në familjarët ose të afërmit e tyre, si edhe ajrosja e personave të paraburgosur në intervale dhe ambiente të caktuara.

Komiteti Shqiptar i Helsinkit vë në dukje se gjatë këtyre viteve ka reaguar disa herë publikisht ndaj kësaj gjendjeje që cënon të drejtat e shtetasve dhe standartet minimale të përcaktuara në dokumentat ndërkombëtare dhe në legjislacionin shqiptar, por   vëmë re se gjendja mbetet e njëjtë.

Komitetit Shqiptar i Helsinkit është i mendimit se i takon në rradhë të parë Ministrisë së Drejtësisë të marrë masat përkatëse për përmirësimin e kësaj gjendjeje. Në këtë drejtim do të kontribuonte ndjeshëm, kalimi i shpejtë i vendeve të paraburgimit në varësi të Ministrisë së Drejtësisë si dhe shfrytëzimi i të gjitha mundësive që dispozitat ligjore në fuqi të gjejnë zbatim të plotë. 

Komiteti Shqiptar i Helsinkit i drejtohet Ministrisë së Rendit Publik, që të marrë masat e duhura për të zbutur problemet që ekzistojnë në vendet e paraburgimit. Fakti që këto vende janë ende në mjediset e komisariateve dhe mbikqyren nga punononjës të policisë, e detyron këtë Ministri të zbatojë ligjin dhe të respektojë të drejtat e personave të arrestuar. KSHH-ja rithekson faktin se personat e arrestuar deri në momentin e dhënies së një vendimi të formës së prerë nga gjykata konsiderohen të pafajshëm.

Komiteti Shqiptar i Helsinkit   u drejtohet organeve të prokurorisë dhe të drejtësisë shqiptare që të rrisin efektivitetin dhe shpejtësinë e procedimeve penale, me qëllim që të shmangen rastet e mbajtjes së personave të arrestuar në vendet e paraburgimit deri në kufirin e afateve maksimale ligjore.