T’i jepet fund vazhdimit të mbajtjes në paraburgim të personave të dënuar

me vendim të formës së prerë të gjykatës

13.04.2005

Korrespodenti i Komitetit Shqiptar të Helsinkit na njofton se para dy ditësh në ambjentet e Komisariatit të Elbasanit ka nisur një protestë nga një pjesë e personave që mbahen në dhomat e paraburgimit të këtij komisariati. Ata janë kryesisht të dënuar me vendim të formës së prerë të gjykatës.

Sipas korrespodentit tonë, ata kërkojnë trasferimin e tyre në institucionet e vuajtjes së dënimit. Sipas verifikimeve në vend dhe bisedave me Drejtorin e Policisë së Qarkut, shefin e rendit, përgjegjësin e dhomave të paraburgimit ka rezultuar se në Komisariatin e Policisë së Elbasanit megjithëse kapaciteti është llogaritur për 45 persona në fakt ndodhen 80 persona. Kjo e vështirëson gjendjen aq më tepër tani që fillon koha e nxehtë. Gjatë vëzhgimit rezultoi se midis 80 personave, 16 janë të dënuar me vendim të formës së prerë.

Drejtoria e Qarkut Elbasan i është drejtuar me dy shkresa Drejtorisë së Përgjithshme të Burgjeve me kërkesën për transferimin e të dënuarve me vendim të formës së prerë të gjykatës.

Komiteti Shqiptar i Helsinkit e ka ngritur disa herë nevojën urgjente që të gjithë të dënuarit me vendim të formës së prerë të trasferohen në institucionet e vuajtjes së dënimit, por siç duket megjithë masat e marra çështja e mësipërme mbetet problematike. Është kjo arsyeja, që KSHH e shikon të nevojshme që për këtë problem t’i drejtohet edhe një herë Ministrisë së Drejtësisë dhe Drejtorisë së Përgjithshme të Burgjeve. Për të gjithë është e qartë se mbajtja në gjendje paraburgimi e të dënuarve me vendim të formës së prerë të gjykatës përbën shkelje të ligjit që mund të shoqërohet me shqetësime dhe pasoja të dëmshme.

Komiteti Shqiptar i Helsinkit, me këtë rast i sugjeron Ministrisë së Drejtësisë që për efekte transparente ta marrë në shqyrtim çështjen e mësipërme duke përcaktuar afatet përkatëse që do t’i jepnin zgjidhje kësaj gjendjeje.