KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Edhe një herë për qelitë e paraburgimit

Tiranë, më 13.06.2003

Korrespondenti i KSHH-së për Shkodrën njofton për një incident të rëndë të ndodhur në 6 qershor 2003 në qelitë e paraburgimit të Komisariatit të Shkodrës.  Versionet janë të kundërta.  Nga policia pretendohet se forcat e rendit kanë hyrë në qeli për të marrë një të paraburgosur të sëmurë, për të cilin mjeku kishte rekomanduar të shtrohej në spital.  Të paraburgosurit duket se kanë marrë shkas nga ky rast për të protestuar ndaj gjendjes në qelitë e paraburgimit, aq më tepër që këto qeli janë të mbipopulluara.  Dhe këtu ka ndodhur ndeshja midis të paraburgosurve dhe forcave të rendit.

Nga të dhënat rezulton se dhuna është përdorur nga të dyja anët.  Policia thotë se ajo është sulmuar nga të burgosurit në qeli dhe disa policë janë rrahur keq.  Por nga burime të tjera jashtë policisë, thuhet se policët kanë fyer me zë të lartë të paraburgosurit dhe kjo ka shkaktuar një reagim të menjëhershëm të të paraburgosurve në qelitë e tjera të cilët janë përpjekur madje të thyejnë qelitë.  Njoftohet po ashtu, se në datën 6 qershor, të paraburgosurit kanë filluar një grevë urie.

KSHH shpreh mendimin se dhuna është e pajustifikueshme në dhomat e vuajtjes së dënimit.  Në radhë të parë, policia duhet të bëjë kujdes t'i shmanget asaj.  Por ky incident na sjell përsëri te një çështje që KSHH e ka shtruar disa herë.  Nga policia kërkohet që të zbatohet ligji i aprovuar, që i vë qelitë e paraburgimit në varësi të Ministrisë së Drejtësisë.  Veç asaj, vazhdon të jetë i madh numri i të dënuarve me vendim gjyqësor që presin të kalojnë në burgje dhe jo të mbahen në komisariatet e policisë.

Ka ardhur koha që ky problem të shikohet më seriozisht dhe të gjejë zgjidhje sa më parë.