Dhuna dhe trajtimi çnjerëzor janë të dënueshme

14.04.2004

Komiteti Shqiptar i Helsinkit, para disa ditësh u njoftua me telefon nga një person që nuk ka dashur të identifikohet se në komisariatin e policisë së Shkodrës, për shkak të dhunës që ishte ushtruar nga disa punonjës të rendit, ndodhej në gjendje të rëndë shëndetësore i quajturi Luigj Vuçeta.

Për verifikimin e këtij sinjalizimi, KSHH ngarkoi korrespondentin e tij në qytetin e Shkodrës. Në datën 9 Prill 2004, fillimisht ai mori takim me oficerin e rojes dhe pas kësaj me dijeninë e Zv/Drejtorit të Policisë, edhe me të ndaluarin Luigj Vuçeta. Nga këqyrja e regjistrit, rezultonte se Luigj Vuçeta ishte ndaluar në datën 5 Prill 2004, ndërsa më 8 Prill 2004, ishte marrë si masë sigurie arrestimi i tij. Mjeku i Drejtorisë së Policisë së Qarkut Shkodër Z. Sokol Preçi, qe i thirrur në komisariat i kishte dhënë ndihmën e parë Luigjit, deklaroi se pasi i kishte bërë një injeksion, e kishte dërguar në spital për të marrë serum.

Me Luigj Vuçetën, korrespondenti i KSHH-së në Shkodër mori takim në “dhomën e takimeve”, ku atë e sollën të shtrirë në një batanije që zëvendësonte barrelën. I pyetur se çfarë kishte ndodhur, ai deklaroi si më poshtë:

“Në momentin e arrestimit, disa punonjës policie më goditën me grushta, shkelma dhe me qytën e automatikut. Të njejtat veprime ata kryen edhe gjatë shoqërimit tim për në komisariat, ndërsa brenda në ambientet e komisariatit më lidhën tek disa hekura dhe përsëri vazhduan të më goditnin”. Korrespondenti i KSHH-së konstatoi gjurmë ngjyrë gjaku të mpiksur në veshin e majtë, plagë dhe gërvishtje në të dy këmbët, dëmtime të lëkurës në kokë. Luigj Vuçeta ankohej për dhimbje të forta në pjesë të ndryshme të trupit sa mezi qëndronte edhe ulur.

KSHH e shikon të nevojshme të përmendë gjithashtu edhe pretendimin e punonjësve të policisë që fillimisht ishin të pranishëm në këtë takim, se Luigji rezistoi në momentin ë ndalimit, prandaj edhe u përdor dhuna. Kuptohet se pretendimi i mësipërm kërkon hetim sepse edhe sikur ai të jetë i vërtetë, ka të dhëna se është tejkaluar në mënyrë evidente përdorimi i saj.

KSHH denoncon publikisht këtë akt të kundraligjshëm dhe u sugjeron organeve të ndjekjes, që duke marrë shkas nga kjo ngjarje, si edhe nga vetë kërkesa verbale e Luigj Vuçetës, kjo çështje të ndiqet dhe të hetohet me preçedencë dhe me objektivitet.

KSHH e shikon të nevojshme gjithashtu të theksojë se raste të përdorimit të dhunës nga ana e punonjësve të policisë, sidomos në momentin e ndalimit dhe të shoqërimit, nuk kanë qenë të pakta, pavarësisht se në këtë drejtim janë marrë edhe masa.

Askujt nuk i lejohet që ndaj shtetasve qofshin këta të ndaluar apo të arrestuar, të ushtrohet dhunë fizike apo trajtim çnjerëzor.

Veprime të tilla të kryera qoftë edhe nga punonjës të veçantë të organeve të rendit, cënojnë të drejtat e shtetasve dhe vetë reputacionin e këtij organi. Prandaj është e nevojshme që në përputhje me ligjin, të merren jo vetëm masa disiplinore, por kur është rasti, edhe penale.