Tryezë pune për

“Respektimin e të drejtave të personave të paraburgosur

- disa çështje të ligjit dhe praktikës”

Tiranë më 14.04.2005 

Në datën 14 Prill 2005, në ambjentet e Hotel Rognerit, Komiteti Shqiptar i Helsinkit organizoi një tryezë pune për “Respektimin e të drejtave të personave të paraburgosur - disa çështje të ligjit dhe praktikës”. Të ftuar në këtë tryezë ishin përfaqësues të lartë të Ministrisë së Rendit Publik, Ministrisë së Drejtësisë, Drejtorisë së Përgjithshme të Burgjeve, drejtues të institucioneve të paraburgimit të vëzhguara nga KSHH-ja si edhe vëzhgues të KSHH-së. Qëllimi i kësaj tryeze ishte adresimi i disa problemeve të dala nga zbatimi i Rregullores Nr. 1075, datë 15.09.1999 të Ministrisë së Rendit “Për sigurimin e trajtimin e të paraburgosurve”, probleme të cilat janë vënë re gjatë vëzhgimeve të vazhdueshme të ndërmarra nga KSHH.

Gjithashtu, Komiteti Shqiptar i Helsinkit me anë të kësaj tryeze tërhoqi edhe një herë vëmendjen se Rregullorja Nr. 1075 e miratuar nga Ministria e Rendit vjen në kundërshtim me Ligjit Nr. 8328 datë 16.4.1998 “Për të drejtat dhe trajtimin e të dënuarve me burgim”. KSHH që nga hyrja në fuqi e kësaj rregulloreje ka paraqitur zyrtarisht vërejtjet e tij në lidhje me këtë akt nënligjor, por fatkeqësisht këto nuk janë marrë parasysh nga autoritetet përkatëse shtetërore.

Folësit në këtë tryezë u ndalën në disa probleme konkrete të cilat kufizonin ose mohonin të drejtat e garantuara me ligj të personave të paraburgosur për shkak të zbatimit të kësaj Rregulloreje. Disa nga këto probleme i gjeni si më poshtë:

1. Përkeqësimi i kushteve higjeno-sanitare në dhomat e paraburgimit si rrjedhojë e orarit të kufizuar për të paraburgosur për të kryer nevojat e tyre personale.

2. Mungesa e dispozitave përkatëse që do të sigurojnë standartet e vendosura në ligj përsa i takon higjenës personale të paraburgosurve.

3. Mungesa e dispozitave në Rregullore lidhur me garantimin e cilësisë së ushqimit dhe kontrollit të tij.

4. Mungesa e dispozitave që garantojnë një shërbim shëndetësor 24 orë ashtu siç e parashikon Ligji Nr. 8328, datë 16.4.1998 “Për të drejtat dhe trajtimin e të dënuarve me burgim”.

5. Ndalimi i çdo lloj literature informuese ose fetare në dhomat e paraburgimit. Kjo është një shkelje flagrante e dispozitës ligjore nenin 41 i Ligjit nr. 8328, datë 16.4.1988 “Mbi të drejtat dhe trajtimin e të dënuarve me burgim”.

6. Mungesa e dispozitave nënligjore lidhur me mundësimin e punës edukative në institucionet e paraburgimit.

7. Mungesa e rregullimeve nënligjore për të mundësuar një trajtim të veçantë për të paraburgosurit e mitur dhe ato gra.

 Gjithashtu, përfaqësuesit e KSHH-së nga analiza që i bënë këtyre çështjeve theksuan se zbatimi i kësaj Rregulloreje është i papranueshëm, sidomos mbas miratimit të Rregullores Nr. 3750/2, datë 23.7.2003 të Ministrisë së Drejtësisë “Për organizimin e funksionimin e sistemit të paraburgimit”. KSHH mendon se, edhe pse në fakt shumica e vendeve të paraburgimit nuk i ka kaluar Ministrisë së Drejtësisë, ligjërisht ato i kanë kaluar asaj që në vitin 2001.

Në përfundim të tryezës KSHH-ja paraqiti rekomandimet e mëposhtme:

a) Në të gjitha vendet e paraburgimit të zbatohet ligji Nr. 8328, datë 16. 4. 1998 “Për të drejtat dhe trajtimin e të dënuarve me burgim” dhe Rregullorja e Ministrisë së Drejtësisë.

b) Të shfuqizohet Rregullorja Nr. 1075, datë 15.9.1999 e Ministrisë së Rendit Publik

c) Në të gjitha komisariatet e policisë ose në të gjitha vendet e paraburgimit të dërgohet Rregullorja e Ministrisë së Drejtësisë

d) Të planifikohet njohja e Rregullores së Ministrisë së Drejtësisë nga të gjithë punonjësit që shërbejnë në vendet e paraburgimit

e) Të paraburgosurit të njihen (duke përdorur format më të përshtatshme) me përmbajtjen e Rregullores së Ministrisë së Drejtësisë.

KSHH shpreson se organet përkatëse shtetërore do të marrin masat e duhura për të siguruar respektimin e të drejtave të personave të paraburgosur dhe një trajtim i tyre në përputhje me ligjin Nr. 8328, datë 16. 4. 1998 “Për të drejtat dhe trajtimin e të dënuarve me burgim”.   

Kjo tryezë zhvillohet në kuadër të projektit “Reforma në burgje dhe roli i shoqërisë civile në Shqipëri” i mbështetur financiarisht nga Komiteti Suedez i Helsinkit.