KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Rast tjetër i shkeljes së ligjit

për tre të burgosur në grevë urie

që mbahen në qelitë e paraburgimit të komisariatit të Pogradecit

15.07.2002

KSHH e ka ngritur më se një herë çështjen e mbajtjes së të dënuarve në qelitë e paraburgimit të Komisariateve të policisë edhe pasi janë dënuar me vendim gjykate të formës së prerë.  Kjo gjendje ka dhënë shkas për shumë ankesa nga ana e të burgosurve, të cilët detyrohen të përballen me kushte shpesh të vështira dhe çnjerëzore. 

Në shtyp ka dalë njoftimi për një rast veçanërisht të rëndë, ku tre të burgosur kanë shpallur grevë urie për arsye se po bëhen tre vjet që mbahen në qelitë e paraburgimit të Komisariatit të Pogradecit, edhe pse kanë marrë vendimin përkatës me vendim gjykate të formës së prerë.  Kjo është një shkelje e rëndë e ligjit dhe nuk mund të ketë justifikim për një situatë të tillë.

KSHH u është drejtuar në disa raste autoriteteve kompetente që të marrin masa urgjente për të përmirësuar gjendjen.  Është  thënë vazhdimisht se një situatë e tillë është pasojë e mbipopullimit të burgjeve.  Është e kuptueshme se kjo situatë nuk mund të gjejë një zgjidhje të plotë në kushtet aktuale.  Por KSHH mendon se mund të ketë një radhë për të transferuar të dënuarit e paraburgosur në burgje.  Rasti i mësipërm është veçanërisht i mprehtë dhe është e palejueshme që të dënuar prej vitesh të mbahen në qelitë e paraburgimit.  Duhet të jetë në qendër të vëmendjes së organeve kompetente që, në kushtet e mbipopullimit, në radhë të parë duhet të transferohen në burgje të dënuarit për një kohë të gjatë.  Një periudhë kaq e gjatë kohe si p.sh. ajo e Komisariatit të Pogradecit është e palejueshme dhe reagimi i të dënuarve është plotësisht i përligjur. 

Duhen marrë masa që ky rast të gjejë sa më shpejt zgjidhje, për të shmangur pasojat e rënda, që mund të reflektohen në gjendjen shëndetësore dhe psikologjike të të dënuarve.