KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Mbipopullimi i qelive të paraburgimit   

vazhdon të rëndojë gjendjen e të dënuarve

Tiranë, 15.VII.2003

Është bërë e njohur se në qelitë e paraburgimit të Komisariatit të Vlorës prej disa ditësh janë futur në grevë urie tetë të burgosur. Grevistët kanë dalë me një kërkesë krejt të ligjshme, ata janë dënuar me vendim të formës së prerë të gjykatës dhe në bazë të ligjit duhet të çohen në vendet e vuajtjes së dënimit. Në fakt, ata duhej të ishin çuar me kohë për të vuajtur dënimin në burgjet përkatëse.

KSHH është prononcuar disa herë për këtë problem në bazë të vëzhgimeve të vazhdueshme të situatës në vend. Ai ka kërkuar zbatimin rigoroz të ligjit nr. 8331 dt. 21.04.1998 “Për ekzekutimin e vendimeve penale”.

Megjithatë me keqardhje konstatojmë se masat e marra për përmirësimin e gjendjes kanë qenë të ngadalta dhe shpesh janë justifikuar duke iu referuar arsyeve objektive. KSHH ka parasysh vështirësitë, por kurrsesi nuk mund të tolerohet mbajtja në gjendje paraburgimi i rreth 240 personave në shkallë republike, të dënuar me vendime të formës së prerë të gjykatave.

Për këtë gjendje dhe për reagimet e KSHH janë në dijeni autoritetet përkatëse: Gjykata, Prokororia, Ministria e Drejtësisë, Ministria e Rendit dhe Drejtoria e Përgjithshme e Burgjeve.

KSHH e sheh me vend që, duke marrë shkas nga ky rast, t’i drejtohet qeverisë, komisioneve parlamentare të çështjeve kushtetuese e ligjore, si dhe të mbrojtjes së të drejtave të njeriut të urdhërojnë dhe të ndërhyjnë për zbatimin e ligjit.

Zgjidhja e shpejtë e këtij problemi do të shërbente për respektimin e të drejtave të njeriut, si dhe për parandalimin e fenomeneve të dënueshme dhe të padëshirueshme.