Integrimi i Shqipërisë dhe shoqëria civile  Emigrantët  Media  Zgjedhjet  Të miturit  Minoritetet  Policia  Edukimi ligjor  Shërbimi ligjor  Burgjet dhe vendet e paraburgimit  Shëndeti dhe të drejtat e njeriut  Ekzekutimi i vendimeve gjyqësore  Letra të KSHH  Informacione të tjera  PROJEKTE  RAPORTE  DEKLARATA

   ZGJEDHJET PARLAMENTARE

STRATEGJIA 2007-2010

  TAKIME KESHILLIMORE

RAPORT

MBI

TRYEZËN E RRUMBULLAKËT

Organizuar nga Komiteti Shqiptar i Helsinkit

Në datën 6 Prill 2006

Në kuadër të rritjes së shkallës së ndërgjegjësimit dhe njohjes me të drejtat e njeriut dhe zbatimit të ligjeve nga administrata e burgjeve, si edhe me qëllim mbështetjen e autoriteteve shqiptare në përpjekjet e tyre për reformimin e mëtejshëm të institucioneve penitenciare, në datën 6 Prill 2006, në ambjentet e Hotel Doros, Komiteti Shqiptar i Helsinkit organizoi një tryezë të rrumbullakët lidhur me organizimin, funksionimin dhe shpërblimin e punësimit të të dënuarve në burgje. Qëllimi i kësaj tryeze të rrumbullakët ishte për të diskutuar lidhur me kuadrin ligjor shqiptar me synim krijimin e mundësive të nevojshme për punësimin e të dënuarve në burgjet shqiptare. Më konkretisht, kjo tryezë u përqëndrua në diskutimin e projektvendimit të Këshillit të Ministrave “Për zhvillimin e aktivitetit të punës në institucionet e ekzekutimit të dënimeve penale dhe kriteret për shpërblimin e saj”.

Në këtë aktivitet morën pjesë dhe kontribuan me pjesëmarrjen e tyre përfaqësues nga Drejtoria e Kodifikimit dhe e Institucioneve Penitenciare të Ministrisë së Drejtësisë që kanë punuar drejtpërdrejtë me këtë projektvendim, Z. Lulëzim Kodra, Zëvendës Drejtor i Përgjithshëm i Burgjeve, drejtori i burgut të Kosovës dhe drejtoresha e burgut Ali Demi në Tiranë, dhe disa përfaqësues të tjerë nga Drejtoria e Përgjithshme e Burgjeve. Në këtë tryezë ofruan ekspertizën e tyre ekspertët e huaj Z. Jan van den Brand, Drejtor i Marrëdhënieve me Jashtë në Agjencinë Kombëtare Hollandeze të institucioneve të Riedukimit si edhe në të njëjtën kohë ekspert i Këshillit të Europës për Europën Qendrore dhe Lindore dhe Z. Peeter Naks, ekspert për çështjet penitenciare në Misionin e Euraliusit në Shqipëri. KSHH në këtë aktivitet u përfaqësua nga Znj. Edlira Papavangjeli, Kordinatore Pogramesh dhe Znj. Ersida Sefa, asistente projektesh.

Pjesëmarrësit vlerësuan si inisiativë shumë pozitive procesin e nisur dhe të gjithë punën e realizuar deri tani lidhur me punësimin e të dënuarve në burgje. Krahas sugjerimeve dhe rekomandimeve të ofruara nga ekspertët e huaj, një grup pune nga Drejtoria e Përgjithshme e Burgjeve pasi e kishin studiuar projektvendimin ofruan komentet e tyre lidhur me të. Një ndër çështjet kryesore që u diskutua në këtë tryezë të rrumbullakët ishte ajo lidhur me pozicionin dhe kompetencat e Komisionit të Punësimit. Pjesëmarrësit ranë dakort se ky Komision duhet të jetë një institucion konsultativ, përgjegjës për përcaktimin e politikave dhe prioriteteve për punësimin e të dënuarve në burgje si edhe për mbikqyrjen dhe vlerësimin e këtij procesi në të gjitha institucionet peninteciare. Menaxhimi i procesit të punësimit duhet të jetë nën përgjegjësinë e burgjeve lokale meqënëse ata e njohin më mirë situatën në burgjet konkrete, numrin e të dënuarve që aplikojnë për punë dhe mundësitë e punësimit duke marrë në konsideratë kërkesat, aftësitë dhe rrezikshmërinë shoqërore të të dënuarve.

Ekspertët e huaj e ftuar në këtë tryezë të rrumbullakët prezantuan filizofinë e punësimit të të dënuarve përmes disa shembujve të praktikave më të mira të punësimit të dënuarve në disa shtete të tjera. Ekspertët i ofruan pjesëmarrësve disa komente dhe sugjerime të tjera shtesë lidhur me projektvendimin e Këshillit të Ministrave për punësimin e të dënuarve me qëllim për ta bërë atë sa më të sukseshëm gjatë zbatimit në praktikë. Meqënëse realizimi në praktikë i punësimit të të dënuarve në burgje është pjesa më sfiduese e këtij procesi, ekspertët i shpjeguan pjesëmarrësve se është shumë e rëndësishmë për të nisur me studime fizibiliteti të të gjithë burgjeve krahas zhvillimeve të mëtejshme për përmirësimin e projektvendimit për punësimin e të dënuarve. Ekspertët e analizuan projektvendimin të ndarë në tre pjesë të rëndësishme; organizimi në të gjitha aspektet i punësimit të të dënuarve në burgje, zbatimi i projektvendimit të punësimit të të dënuarve si edhe shpërblimi i të dënuarve të punësuar.

Një tjetër temë e rëndësishme për të cilën u zhvilluan shumë diskutime nga pjesëmarrësit ishte ajo e shpërblimit të të dënuarve të punësuar. Pjesëmarrësit në tryezë ranë dakort se shpërblimi i të dënuarve duhet të parashikohet në vendimin e Këshillit të Ministrave dhe duhet të ndiqet nga e njëjta politikë në të gjitha burgjet. Ekspertët dhe pjesëmarrësit diskutuan disa modele të ndryshme përsa i përket shpërblimit të të dënuarve të punësuar, sistemin që do të ishte më shumë i rekomandueshëm për realitetin shqiptar, avantazhet dhe disavantazhet e tij.

Në përfundim të tryezës së rrumbullakët ekspertët vendosën të ofronin komente dhe rekomandime të tjera shtesë lidhur me funksionimin e Komisionit të Punësimit, shpërblimin e të dënuarve të punësuar dhe politikat implementuese të të gjithë procesit të punësimit. Grupi i punës i ngritur për çështjen e punësimit në Drejtorinë e Përgjithshme të Burgjeve dhe Ministria e Drejtësisë do të marrin në konsideratë këto rekomandime dhe sugjerime të ekspertëve mbi bazën e të cilave do të punojnë për hartimin e versionit përfundimtar të këtij projektvendimi i cili sërisht do të komentohet nga ekspertët e huaj.

Në këtë kuadër Komiteti Shqiptar i Helsinkit planifikon të vazhdojë këtë proces permes organizimit të një seminari pune në një burg pilot ku ekspertët e huaj do të japin ekspertizën e tyre lidhur me zbatimin e një projekti pilot për punësimin e të dënuarve mbështetur në studimet e fizibilitetit të realizuara në këtë burg.