Gjëndje tejet e rëndë në vendet e paraburgimit

01.07.2004

Me 28 qershor 2004, rreth mesditës, të paraburgosurit që ndodhen në komisariatin e policisë Vlorë, kanë protestuar për të kërkuar përmirësimin e respektimit të të drejtave të tyre.

Sipas korrespondentit të KSHH-së në Vlorë dhe nga takimet me persona të paraburgosur rezultoi se ndër të tjera shkak i protestës kanë qënë kushtet higjenike të këqija, mbipopullimi i qelive i cili bëri të padurueshëm jetesën në to si edhe temperaturat e larta të këtyre ditëve të fundit.

Komiteti Shqiptar i Helsinkit mëse njeherë ka reaguar publikisht dhe ka sinjalizuar verbalisht dhe me shkresa organet përkatëse, midis tyre edhe Këshillin e Ministrave për gjendjen e rëndë në vendet e paraburgimit të disa komisariateve të policisë dhe në atë të Vlorës.

Komiteti Shqiptar i Helsinkit nuk mohon faktin se në këtë drejtim janë marrë disa masa, por vlerësojmë se ato nuk janë të mjaftueshme dhe të atilla që të ndikojnë në respektimin e të drejtave të personave të paraburgosur dhe të dënuar që mbahen në këto vende. Këtë fakt e dëshmon mjaft mirë dhe ngjarja e ditëve të fundit.

Do të mjaftonte të përmendim faktin se nga vëzhgimi i fundi i kryer nga Komiteti Shqiptar i Helsinkit në komisariatet e policisë në rrethet ku vepron rrjeti i korrespondentëve i këtij komiteti, përfshirë këtu edhe vendet e paraburgimit në Vlorë që kanë kaluar në varësi të Ministrisë së Drejtësisë, situata në këto vënde ka ardhur duke u keqësuar.

Për Komitetin Shqiptar të Helsinkit nuk është i justifikueshëm fakti që vendet e paraburgimit ende nuk kanë kaluar tëresisht në varësi të Ministrisë së Drejtësisë, siç e përcakton edhe ligji “Mbi organizimin dhe funksionimin e Ministrisë së Drejtësisë” dhe vendimi i Këshillit të Ministrave për marrjen e masave për kalimin e vendeve të paraburgimit.

Sipas mendimit të Komitetit Shqiptar të Helsinkit, kjo zvarritje në një masë të konsiderueshme ka ndikuar negativisht në gjendjen e rëndë të dhomave të paraburgimit si dhe në respektimin e të drejtave të paraburgosurve, pa përmendur këtu edhe faktin tjetër mjaft shqetësues se ka ende një numër jo të vogël të dënuarish me vendim të formës së prerë që mbahen në vendet e paraburgimit.

Komiteti Shqiptar i Helsinkit veren me shqetësim të madh se ligji “Mbi organizimin dhe funksionimin e Ministrisë së Drejtësisë” dhe vendimi i Këshillit të Ministrave “Për kalimin e vendeve të paraburgimit në varësi të Ministrisë së Drejtësisë” nuk u shoqërua me përcaktimin e fondeve të nevojshme dhe të mjaftueshme si dhe me marrjen e masave konkrete të karakterit teknik dhe organizativ që do të garantonin zbatimin e tyre në praktikë.

KSHH i bën thirrje Ministrisë së Drejtësisë dhe Ministrisë së Rendit Publik të marrin masa urgjente për të zbutur efektet negative të mbipopullimit të qelive si dhe efektet e temperaturave të larta.

KSHH i bën thirrje organeve përkatëse në nivel vendor të tregojnë kujdes për trajtimin e personave të arrestuar, të sëmurë kronikë dhe të marrin masa për transferimin e tyre në mjedise më të përshtashme dhe ku kujdesi shëndetësor është i mundur.

KSHH-ja i bën thirrje organeve të prokurorisë dhe gjykatës të shmangin zvarritjet e proceseve gjyqyësore, të zhvillojnë hetime paraprake dhe shqyrtimet gjyqsore në kohën më të shpejtë të mundur, duke zbutur në këtë mënyrë mbipopullimin e qelive për shkaqe subjektive.

KSHH-ja i drejtohet Qeverisë Shqiptare për të përshpejtuar procesin e kalimit real të vendeve të paraburgimit në varësi të Ministrisë së Drejtësisë duke parashikuar mjedise të përshtatshme dhe buxhete të mjaftueshme.

Komiteti Shqiptar i Helsinkit e shikon të nevojshme të ripërsërisë thirrjen gjithë organeve shtetërore kompetente që ky problem të vlerësohet seriozisht, duke marrë masat për parandalimin e fenomeneve të tilla në të ardhmen.