KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Shkelje serioze të të drejtave të njeriut

29.10.2001

Një grup vëzhguesish të KSHH gjatë muajit tetor të këtij viti kanë monitoruar disa vende (komisariate policie) ku mbahen të ndaluar dhe të paraburgosur.

Gjatë këtij vëzhgimi u vërejtën raste të shkeljes të procedurës penale që kanë sjellë si pasojë cënimin e të drejtave të njeriut. Si të tilla mund të përmendim:

1. Në mjaft raste oficerët e policisë gjyqësore personave të ndaluar dhe të arrestuar në flagrancë nuk u bëjnë të njohur në kohën e duhur të drejtat e garantuar me ligje, midis tyre edhe atë të së drejtës për të patur avokat. Kjo rezulton jo vetëm nga thëniet e personave të ndaluar dhe të paraburgosur, por edhe nga dokumentet përkatëse: nga libri i shërbimit, nga proces-verbalet e mbajtura kur ata janë marrë në pyetje si dhe nga proces-verbalet e shqyrtimit nga ana e gjykatave të masave të sigurimit. Mund të përmendim këtu rastin e të miturit Nermin Ranxha (Elbasan), Sokol Gega (Vlorë),  si edhe të Agron Laçit dhe Genc Jakut (Krujë), etj.

Flagrante janë rastet e Nderim Veliut (Berat) dhe Elidon Nokës (Skrapar) të mbajtur në komisariate përkatësisht 12 ditë dhe 5 ditë pa u vendosur masa e arrestit.

2. Në mjaft komisariate si në Lezhë, në Kukës dhe në Krujë në kushte të papërshtatshme janë mbajtur në dhomat e paraburgimit gra të akuzuara për vepra të ndryshme penale, në kundërshtim me rregulloren e brendshme.

3. Në disa komisariate vazhdojnë të mbahen persona të dënuar me vendim të formës së prerë të gjykatave, gjë që vjen në kundërshtim me ligjin mbi ekzekutimin e vendimeve penale. Mund të përmendim këtu komisariatet e Vlorës me 18 persona, i Fierit me 15 persona, i Krujës me 12 persona, i Elbasanit me 27 persona, i Lushnjës me 13 persona, etj.

Vlen të përmendet se ka nga këta persona që mbi një vit mbahen në dhomat e paraburgimit. I tillë është rasti i Genc Veizit (Lushnjë), i dënuar me 1 vit e 7 muaj burg. Urdhëri i ekzekutimit mban datën 19-12-2000 dhe vuajtjen e dënimit ai po e kryen në dhomat e paraburgimit. Ilir Muka (Vlorë) mbahet në dhomat e paraburgimit megjithëse ka dhjetë muaj që vendimi ka marrë formë të prerë, etj. 

4. Vazhdon mbipopullimi në komisariatet e policisë, gjë që ndikon negativisht në trajtimin e të ndaluarve dhe të paraburgosurve dhe që deri në një farë mase cënon të drejtat e tyre si në bazë të legjislacionit ndërkombëtar edhe sipas legjislacionit dhe akteve tona nënligjore.

Kështu p.sh. Elbasani mban mbi kapacitet 45 persona, Gramshi 10 persona, Vlora 49 persona, Lushnja 32 persona, Fieri 52 persona, etj.

5. Disa të ndaluar dhe të paraburgosur kanë pretenduar se në momentet e para të ndalimit ose të arrestimit të tyre në flagrancë janë keqtrajtuar. Si raste të verifikuara mund të përmendim atë të Leonard Çaushit (në komisariatin e Beratit) dhe të Afrim Myftarit (në komisariatin e Shkodrës).

Duke u nisur nga shkeljet e mësipërme, që pjesërisht janë të përsëritura, i sugjerojmë Prokurorisë së Përgjithshme, Ministrisë së Rendit dhe Ministrisë së Drejtësisë që të marrin masat përkatëse për parandalimin e shkeljeve të tilla.