Takime me përfaqësues të shtetit 

Takim i përfaqësuesve të KSHH-së me

z. Fatmir Xhafa, Ministër i Drejtësisë

02.03.2004

Duke vlerësuar rolin e Ministrisë së Drejtësisë në reformën e sistemit gjyqësor në Shqipëri, me kërkesë të Komitetit Shqiptar të Helsinkit (KSHH), në datën 10 shkurt 2004 u organizua një takim me z. Fatmir Xhafa, Ministër i Drejtësisë. Në këtë takim, KSHH-ja u përfaqësua nga znj. Vasilika Hysi, Drejtore Ekzekutive e KSHH-së, z. Niazi Jaho, këshilltar ligjor i KSHH-së si dhe znj. Edlira Papavangjeli, koordinatore programesh.

Gjatë takimit u diskutuan probleme të ndryshme që janë konstatuar nga Komiteti Shqiptar i Helsinkit gjatë veprimtarisë së tij. Problemet kryesore që u diskutuan ishin ecuria e procesit të kalimit të vendeve të paraburgimit në varësi të Ministrisë së Drejtësisë, problemi i të sëmurëve psikikë që mbahen padrejtësisht në vendet e paraburgimit dhe të burgjeve, ekstradimi i të dënuarve shqiptarë nga burgjet e Italisë dhe të Greqisë, grevat e urisë të organizuara prej tyre, etj. KSHH ngriti shqetësimin se transferimi i të dënuarve shqiptarë nga burgjet e vendeve të tjera dhe goditja e krimit në Shqipëri, mund të sjellë mbipopullimin e vendeve të paraburgimit dhe burgjeve, ç’ka kërkon hartimin e një strategjie afatgjatë por edhe një politikë penale më efikase.

Një çështje tjetër me rëndësi e shtruar për diskutim nga përfaqësuesit e KSHH-së, ishte kërkesa e këtij të fundit që Ministria e Drejtësisë të marrë mendimin e shoqërisë civile për projektligjet që kanë të bëjnë me liritë dhe të drejtat e njeriut si dhe për ndryshime të mundshme në Kodin e Procedurës Penale si dhe në Kodin Penal.

Pjesë e takimit ishte edhe prezantimi i veprimtarisë së KSHH-së në fushën e respektimit të të drejtave të shtetasve në sistemin gjyqësor dhe prezantimi i përfundimeve të dala nga studimi që ky Komitet i ka bërë legjislacionit dhe praktikës së ekzekutimit të vendimeve penale, në kuadër të nismës së shoqërisë civile kundër korrupsionit ACAC me mbështetjen e MSI-së dhe USAID-it. Në këtë takim u diskutua rreth mundësive që Komiteti ka në drejtim të reformës në sistemin e burgjeve.

Nga ana e Ministrit të Drejtësisë u shpreh gadishmëria për bashkëpunimin e kësaj Ministrie me Komitetin si dhe u informuam rreth reformave që ka ndërmarrë kjo Ministri lidhur me ndjekjen e procedurave të ekstradimit, trajnimit të administratorëve, ngritjen e komisioneve të reformës ligjore nën kujdesin e Ministrit të Drejtësisë, realizimi i disa reformave në sistemin e drejtësisë, bashkëpunimi më i ngushtë me median për informimin më të mirë të shtetasve dhe rritjen e transparencës së kësaj Ministrie.

Në fund të takimit të dyja palët u shprehën për forcimin e bashkëpunimit në të ardhmen dhe se Komiteti Shqiptar i Helsinkit do të vazhdojë monitorimin e vendeve të paraburgimit dhe të burgjeve si dhe respektimin e të drejtave të shtetasve nga administrata gjyqësore.