KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Vëzhgim në ambientet e Komisariatit të policisë në Kukës

04.11.2002 

Korrespondenti i KSHH në Kukës raporton mbi një vëzhgim që ai ka kryer në ambientet e Komisariatit të Policisë së qytetit verior. Pasi mori lejen nga prokuroria e rrethit ai shkoi në vend për të parë gjendjen, sa respektohen të drejtat e të ndaluarve dhe të arrestuarve në flagrancë. Ai pati takime paraprake me përgjegjësit kryesorë të Komisariatit.

Në vazhdim u bënë takime në dhomat e paraburgimit me të ndaluarit, të arrestuarit në flagrancë dhe të dënuarit me vendim gjyqësor të formës së prerë që mbahen ende aty.

Në bisedë me një numër të ndaluarish dhe të dënuarisht, këta pretenduan se në momentin e ndalimit apo të arrestimit është ushtruar dhunë nga forcat e policisë, dhunë që ka vazhduar edhe në ambientet e Komisariatit nga oficerët e policisë gjyqësore. U intervistuan 10 të dënuar, të cilët denoncuan forma të ndryshme të përdorimit të dhunës. Ata u ankuan edhe se atyre nuk u bëhen të njohura të drejtat e garantuara me ligj, në veçanti e drejta për t’u mbrojtur me avokat.

Iu kushtua vëmendje e posaçme edhe kushteve materiale në 18 dhoma të paraburgimit. U vu re një mbipopullim i theksuar në këto ambiente. Dhomat e parabugimit kanë një kapacitet për 44 të paraburgosur, kurse aty numri i tyre arrin në 70, pra gati dyfishi i normës. Nga këta 16 janë të dënuar me vendim gjyqësor të formës së pretë. Higjena në dhoma dhe në ambientet e sanitare lenë shumë për të dëshiruar. Ka mungesa elementare si mungesa e batanijeve dhe dyshekëve, për të 70 të dënuarit ka vetëm një dush. Ka ndërprerje të shpeshta të energjisë elektrike, ushqimi është i pamjaftueshëm qoftë si sasi, qoftë si cilësi. Të dënuarit u ankuan edhe për mungesë të trajtimit mjekësor, në të shumtën e rasteve ata detyrohen t’i blejnë vetë barnat për mjekim. U verifikua edhe mosha e të dënuarve, mesatarja është moshë e re 25 vjeç, të mitur dhe gra nuk ka.

KSHH duke u mbështetur në të dhënat e raportit të korrespondentit nga Kukësi tërheq vëmendjen e organeve kompetente për të treguar kujdes për gjendjen në dhomat e paraburgimit të Komisariatit të Kukësit për të parë e vlerësuar këtë informacion që ngre probleme të një karakteri të mprehtë që kanë të bëjnë me respektimin e të drejtave të të dënuarve në ambientet e policisë.