Më së fundi Ministria e Drejtësisë vendos transferimin e të gjithë të dënuarve me vendim me formës së prerë që qëndrojnë në vendet e paraburgimit

06.07.2004

Komiteti Shqiptar i Helsinkit si një organizatë vëzhguese dhe reaguese në fushën e të drejtave të njeriut, ka vëzhguar rregullisht vëndet e paraburgimit, komisariatet e policisë si dhe burgjet për të parë nga afër nivelin e respektimit të të drejtave të personave të ndaluar, arrestuar dhe të dënuar.

Në të gjitha rastet, pas vëzhgimeve të kryera, KSHH-ja përveçse ka informuar median dhe publikun, ka reaguar për kushtet e këqija në këto institucione si dhe për rastet e shkeljes së të drejtave të njeriut në vendet e paraburgimit dhe në burgje duke u kërkuar autoriteteve përkatëse shtetërore marrjen e masave përkatëse. 

Rasti më i fundit i reagimit të KSHH-së për shkeljen e të drejtave të personave të arrestuar dhe të dënuar ka të bëjë me kushtet jashtëzakonisht të rënda në paraburgimin e Vlorës, ku mbipopullimi (më shumë se dyfishi mbi kapacitetin e lejuar), kushtet e këqija dhe temperaturat e larta çuan në revoltën e të arrestuave dhe të dënuarve që gjendeshin në këtë paraburgim.

KSHH pas verifikimit në vend nëpërmjet korrespondentit të tij, të takimeve me personat e arrestuar dhe të dënuar që mbaheshin në këtë komisariat si dhe takimeve me autoritetet vendore përgjegjëse, reagoi publikisht me një deklaratë ku u bënte thirrje autoriteteve shtetërore, konkretisht Qeverisë Shqiptare, Ministrisë së Drejtësisë, Drejtorisë së Përgjithshme të Burgjeve dhe drejtuesve të vendeve të paraburgimit dhe burgjeve, të marrnin masa të menjëhershme për të zgjidhur problemet e mprehta që ekzistojnë në këto vende, sidomos në kushtet e mbipopullimit dhe temperaturave të larta të verës.

Pas reagimeve të herëpashershme të Komitetit Shqiptar të Helsinkit, Z. Fatmir Xhafa, Ministër i Drejtësisë ka ngritur një grup pune për të transferuar në burgjet e Rrogozhinës dhe atij të Peqinit të gjithë të dënuarit me vendim të formës së prerë që aktualisht mbahen në vendet e paraburgimit duke përcaktuar si datë të fundit për transferimin e të dënuarve me vendim të formës së prerë, datën 31 korrik 2004.

Komiteti Shqiptar i Helsinkit shpreh bindjen se kjo masë do të çojë në respektimin e të drejtave të personave të dënuar si dhe do të zbusë problemet e mbipopullimit në komisariate ku dihet se kushtet janë më të këqija se në institucionet e vuajtjes së dënimit.

Komiteti Shqiptar i Helsinkit përshëndet nismën e marrë nga Ministria e Drejtësisë dhe i kujton kësaj të fundit se kjo nismë duhet të shoqërohet me masa të tjera në vendet e vuajtjes së dënimit me qëllim që tranferimi i këtyre personave të mos çojë në përkeqësimin e kushteve të vendeve të vuajtjes së dënimit.

Nga ana tjetër, Komiteti Shqiptar i Helsinkit rithekson edhe njeherë marrjen e masave për vënien në funksionim të plotë të Burgut të Peqinit dhe fillimin e vënies në shfrytëzim të burgut të Lezhës.

Komiteti Shqiptar i Helsinkit do të vazhdojë të monitorojë me kujdes respektimin e të drejtave të personave që u është privuar liria.