Përdorimi i dhunës është i dënueshëm Të paraburgosurit të trajtohen në përputhje të ligjit 

08.05.2004

Ditën e premte, datë 7 maj 2004, rreth orës 22:00 persona të arrestuar dhe të dënuar në komisariatin e rrethit Laç u ngritën në revoltë dhe morën peng një gardian. Sipas pretendimit të tyre, kushtet në paraburgim janë të këqija dhe se ndaj tyre ka patur raste keqtrajtimi dhe se disa persona të dënuar nuk janë transferuar ende në burgje.

Duke marrë shkak nga kjo ngjarje si dhe duke vlerësuar gjendjen e vendeve të paraburgimit në Shqipëri, Komiteti Shqiptar i Helsinkit (KSHH-ja) herë pas herë ka reaguar për shkelje të të drejtave të personave të ndaluar, të arrestuar dhe të dënuar. Megjithë reagimet i tij dhe të organizatave të tjera të të drejtave të njeriut, vendase dhe të huaja, gjendja në vendet e paraburgimit mbetet problematike.

KSHH-ja me keqardhje vëren se procesi i transferimit të vendeve të paraburgimit nga varësia e Ministrisë së Rendit Publik në atë të Ministrisë së Drejtësisë është i ngadaltë dhe pjesërisht formal. Ky proces i filluar me kalimin e komisariatit të Vlorës tregoi se situata e të drejtave të personave të arrestuar nuk është përmirësuar. Është paradoksal fakti, që kalimi i këtij vendi paraburgimi është bërë jo i plotë, për aq kohë sa përgjegjësia e menaxhimit të këtij komisariati është pjesërisht në varësi të Ministrisë së Rendit Publik dhe asaj të Drejtësisë.

KSHH-ja vëren se ka disa vjet që flitet për hapjen e burgut të Lezhës dhe vënien në kapacitet të plotë në shfrytëzim të burgut të Peqinit. Sipas Z. Ramadan Hasanaj, Drejtor i Përgjithshëm i Burgjeve të Shqipërisë, seksioni i sigurisë së lartë me një kapacitet 400 vende pranë Burgut të Peqinit nuk funksionon ende. Burgu i Lezhës me një kapacitet 1 500 vende gjithashtu nuk është vënë në shfrytëzim. KSHH-ja është e mendimit se hapja e këtij burgu dhe shfrytëzimi i plotë i burgut të Peqinit do të zgjidhte problemin e mbipopullimit dhe do të përmirësonte respektimin e të drejtave të personave të arrestuar dhe të dënuar.

KSHH-ja dënon aktet e revoltës kolektive dhe marrjen peng të personelit të vendit të paraburgimit, por në të njëjtjën kohë, i bën thirrje organit të prokurorisë të hetojë me objektivitet dhe me precedencë këtë ngjarrje dhe pretendimet për   keqtrajtime të personave të arrestuar nga personeli i vendeve të paraburgimit si dhe për kushtet e këqija në këtë komisariat.

KSHH-ja i bën thirrje Qeverisë Shqiptare, dhe veçanërisht Ministrisë së Drejtësisë dhe Ministrisë së Rendit Publik të kryejnë sa më shpejt procesin e transferimit të vendeve të paraburgimit, duke ndërmarrë hapa konkrete dhe të mbështetura financiarisht, dhe jo kalime formale të cilat e rëndojnë pozitën e personave të arrestuar dhe të dënuar.

Komiteti Shqiptar i Helsinkit disa herë e ka ngritur këtë problem, por me keqardhje konstaton se në këtë drejtim vazhdojnë të dhunohen aktet ndërkombëtare, dispozitat kushtetuese, ligji 8328, datë 16.04.1998 “ Për të drejtat dhe trajtimin e personave të dënuar me burgim”.

KSHH-ja i bën thirrje organit të Prokurorisë së Përgjithshme të marrë masa për të forcuar kontrollin e këtij organi për respektimin e të drejtave të personave të arrestuar dhe të dënuar dhe për trajtimin e tyre në vendet e paraburgimit dhe në burgje.

KSHH-ja i bën thirrje prokurorive të rretheve ku ka vende paraburgimi dhe burgje të forcojnë kontrollin e tyre rreth procedurës së ekzekutimit të vendimeve penale dhe respektimin e afatave të transferimit të personave të dënuar nga vendet e paraburgimit në burgje.

Komiteti Shqiptar i Helsinkit i bën thirrje Ministrisë së Drejtësisë të rishikojnë rregulloren e trajtimit të personave në vendet e paraburgimit me qëllim trajtimin human dhe njerëzor të tyre.

Komiteti Shqiptar i Helsinkit i bën thirrje Ministrisë së Rendit Publik dhe Drejtorisë së Përgjithshme të Burgjeve të marrë masa administrative ndaj personave që kanë në administrim vendet e paraburgimit dhe burgje  kur cënojnë ligjin dhe rregulloret e brendshme në institucione.