Projekti:	Drejtimi i institucioneve të paraburgimit sipas këndvështrimit të të drejtave të njeriut
Periudha e zbatimit:	Maj 2006  - Maj 2007
Donator:	Departamenti i Shtetit të Sh.B.A.

 

                                 

 

Komitetit Shqiptar i Helsinkit (KSHH) vëzhgon respektimin e të drejtave e lirive të njeriut dhe reagon për rivënien e tyre në vend; sensibilizon shtetasit mbi mbrojtjen e të drejtave e lirive të tyre; ndihmon përmirësimin e legjislacionit e praktikës për zbatimin e ligjit nëpërmjet oponencave e rekomandimeve gjatë hartimit dhe më pas zbatimit të legjislacionit.

Misioni i KSHH përfshin respektimin e të drejtave të të paraburgosurve dhe të dënuarve me burgim dhe trajtimin e tyre sipas standarteve nderkombetare e legjislacionit vendas. Të drejtat e të paraburgosurve dhe të dënuarve janë pjesë e rëndësishme e të drejtave themelore të njeriut. KShH ka punuar prej vitit 1998 në fushën e paraburgimit përmes projekteve vëzhguese, ndërgjegjësimit, trainimit, këshillimit, lobimit dhe oponencave ligjore, si dhe botimeve.

Me mbështetjen financiare të Fondit për të Drejtat e Njeriut dhe Demokracinë, pranë Departamentit të Shtetit të Sh.B.A., në bashkëpunim të ngushtë me Ministrinë e Drejtësisë dhe Drejtorinë e Përgjithshme të Burgjeve (DPB), KShH do të fillojë në muajin maj projektin një-vjeçar prej $50 000 për rritjen e shkallës së ndërgjegjësimit dhe njohjes me të drejtat e njeriut e zbatimin e ligjeve nga administrata e paraburgimit në burgun e Lezhës.

Disa nga objektivat kryesorë të veprimtarive të planifikuara do të jenë: 

• Të përmirësohen standartet e të drejtave të njeriut në institucionin pilot të paraburgimit; - të rritet shkalla e njohurive teorike e sidomos atyre praktike të administratës së seksionit të paraburgimit, Lezhë;

• Të nxitet e mbështetet ndryshimi i mendësive në trajtimin e të paraburgosurve;

• të aftësohet administrata e paraburgimit për të marrë nisma për hartimin e një plani veprimesh për të mundësuar drejtimin e paraburgimit nga këndvështrimi i të drejtave të njeriut; dhe

• Të ndërgjegjësohen të paraburgosurit mbi të drejtat dhe mekanizmat mbrojtës të këtyre të drejtave, e të ofrohen këshillime ligjore falas për të paraburgosurit në këtë institucion.

Për zbatimin e projektit, KSHH do të përfshijë ekspertë të huaj me shumë përvojë në drejtimin e institucioneve penitenciare, juristë të kualifikuar në fushën penale, veprimtarë e vëzhgues të të drejtave të njeriut, dhe një staf të përkushtuar e me përvojë përkatëse.

Një nga synimet e projektit është që paraburgimi pilot i Lezhës të shërbejë si model për paraburgimet e tjera në varësi të Ministrisë së Drejtesisë në drejtim të mirëmenaxhimit të institucioneve penitenciare ku respektohen të dretjat e njeriut dhe dinjiteti i të paraburgosurve.