Nje rast i rende qe kerkon hetim te shpejte dhe objektiv

09.07.2004

Sipas njoftimeve të shtypit të datës 9 Korrik 2004, ditë e djeshme më datë 8 Korrik 2004 në spitalin Ushtarak të Tiranës, ka ndërruar jetë i mituri Erigert Ceka, vdekja e të cilit dyshohet t’i jetë shkaktuar nga një goditje që ka marrë në kokë ndërsa mbahej në qelitë e paraburgimit Rrëshen.
Komiteti Shqiptar i Helsinkit i vlerësoi këto njoftime dhe veç informacionit të marrë nga autoritet përkatëse në Rrëshen, dërgoi grupin e tij për verifikim në vend (në spitalin Ushtarak të Tiranës) ku ishte shtruar i mituri Erigert Ceka dhe ku kishte ndodhur edhe vdekja e tij.

Nga verifikimet e kryera rezultoi se më datë 5 Korrik 2004 rreth orës 17.00 midis Cekës dhe shokut të tij të dhomës, madhor dhe me probleme të personalitetit ka patur një grindje për motive të dobëta, por me ndërhyrjen e gardianëve më pas ata janë pajtuar. Pasi është shoqëruar në qeli, Ceka ka shfaqur shqetësime si marrje mendsh dhe të vjella, të cilat kanë detyruar punonjësit e policisë ta dërgojnë atë në spitalin e Rrëshenit. Pas disa mjekimeve të dhëna ai rikthehet në dhomat e paraburgimit dhe gjatë natës gjendja e tij shendëtësore rëndohet shumë. Megjithë  trajtimin e bërë nga mjekët e  spitalit të Rreshenit situata  e përkeqësuar e tij bën që i mituri të dërgohet në mesnatë në spitalin ushtarak. Nga verifikimet e bëra nuk del e qartë se kur dhe kush e ka dëmtuar  Cekën , dëmtime që çuan në  vdejkjen e tij.

Nga shqyrtimi i dokumentacionit të kartelës së të miturit të ndodhur pranë spitalit ushtarak rezultoi se:

•  Prej ditësh i mituri ka patur frakturë temporale të kockës pas veshit

• Diagnoza me të cilën është pranuar i mituri Ceka ka qenë komë cerebrale. I mituri ka patur edemë dhe hematoma të t rurit, enjtje dhe grumbullim të gjakut në tru. Pasi i është bërë skaner, diagnoza e këtij të fundit ka qenë frakturë lominoze porietale.

• Sipas mjekëve gjendja e komës është shkaktuar nga goditja me mjete të forta e bënte atë të pashpresë.

Komiteti Shqiptar i Helsinkit nuk është kompetent të bëjë vlerësimin e të dhënave të mësipërme dhe as të konkludojë mbi shkaqet e vërteta që sollën si pasojë vdekjen e Erigert Cekës. Kjo është çështje që u takon të zgjidhet nga ekspertët mjeko-ligjorë.

Komitetin Shqiptar të Helsinkit e shqetëson fakti se ende në dhomat e paraburgimit ku mbahen edhe të mitur vazhdon të mos tregohet kujdes i duhur jo vetëm për trajtimin e personave të paraburgosur në përputhje me ligjin dhe rregulloret e brendshme, por për më keq akoma, nuk po merren masat e duhura për parandalimin e konflikteve që mund të dëmtojnë shëndetin dhe jetën e tyre.

Komiteti Shqiptar i Helsinkit proteston për mënyrën e trajtimit të të miturve në paraburgim mënyrë që vjen në kundërshtim me rregullat ndërkombëtarë dhe ata shqiptarë lidhur me trajtimin e të miturve në institucione të policisë dhe të vuajtjes së dënimit. Konkretisht:

1. Sipas rekomandimeve të OKB-së të përmbledhura në dokumentit Tërësia e Rregullave Minimal të Kombeve të Bashkuara në lidhje me drejtësinë e të miturve (rregullat e Pekinit), të miturit që janë të paraburgosur duhet të veçohen nga të rriturit …… dhe të mbahen në një institucion ku ka edhe të mitur (neni 13&4). Gjatë paraburgimit të miturit duhet të kenë kujdesin, mbrojtjen dhe gjithë asistencen individuale edukative, mjekesore…… edhe fizike (neni 13&5).  Në rastin konkret viktima  ka qënë në të njëjtën qeli me një person madhor dhe pervers.

2. Mbajtja e këtij të mituri është në kundërshtim edhe me nenin 9 të Rregullores “Për organizimin dhe funksionimin e sistemit të paraburgimit i cili përcakton kriteret e shpërndarjes së personave të paraburgosur nëpër dhoma dhe që nënvizon në mënyrë të veçantë se shpërndarja ne dhoma (qeli) i minoreve bëhet më vehte. Në rastin në fjalë i mituri ka qënë në qeli me persona të rritur.

Është pikërisht kjo arsyeja që Komiteti Shqiptar i Helsinkit kërkon nga organet përkatëse që të analizojnë më thellë këto probleme dhe duke marrë shkas nga rasti në fjalë të   përcaktojnë përgjegjësitë e mosrespektimit të rregullave të trajtimit të perosnave të mitur të arrestuar.
Komiteti Shqiptar i Helsinkit i kërkon organeve të ndjekjes penale (prokurorisë), që nëse të dhënat e konstatuara kanë elementë të mjaftueshëm kriminale, të fillonte çështjen penale, gjë që do të ndihmonte jo vetëm në sqarimin e shkaqeve të vërteta që sollën vdekjen e 17-vjeçarit Erigert Ceka, por edhe rrathanat dhe kushtet që mundësuan precipitimin e një ngjarje të tillë.