KSHH

TEL/FAX

++355(4)233671

MISIONI I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

RAPORT

MBI

SESIONIT TE PARE TE PUNES  OFRUAR PERSONELIT TË BURGJEVE SHQIPTARE

7 – 9 Qershor 2004

Ambjentet e Burgut të Rrogozhinës

Në zbatim të misionit mbrojtës, sensibilizues dhe edukues mbi të drejtat e njeriut, me qëllim përmirësimin e respektimit të të drejtave të personave të arrestuar dhe të dënuar, Komiteti Shqiptar i Helsinkit fillon zbatimin e një asistence për një menaxhim bashkëkohor të burgjeve shqiptare, trajtim më të mirë të të dënuarve dhe ndërtimin e marrëdhënive më të mira midis personelit dhe të dënuarve. Përveç asistencës teknike, KSHH-ja do të vazhdojë të monitorojë kushtet në vendet e paraburgimit dhe burgjet, respektimin e të drejtave të të arrestuarve dhe të dënuarve, do të sensibilizojë organet përkatëse shtetërore për një respektim më të mirë të të drejtave të kësaj kategorie shtetasish, si dhe do të bëjë rekomandimet përkatëse për të përmirësuar situatën në vendet e paraburgimit dhe burgjet në Shqipëri.

Midis të tjerash, projekti synon ndërtimin e strategjisë së menaxhimit të një burgu sipas standarteve ndërkombëtare dhe zbatimin e kësaj strategjie në praktikë. Asistenca teknike do t’i jepet institucioneve të vuajtjes së dënimit të Rrogozhinës dhe atij të Peqinit.

Veprimtaria e parë në kuadër të kësaj asistence teknike ishte përcaktimi i vizionit dhe misionit të burgjeve shqiptare si edhe hartimi i një plani konkret veprimi në përputhje me nevojat dhe veçoritë e secilit burg. 

Gjatë sesionit të parë të bashkëpunimit ndërmjet ekspertëve shqiptarë dhe atyre hollandezë e suedezë, u theksua edhe një herë se aspekti më i rëndësishëm i menaxhimit të mirë të një burgu është dimensioni njerëzor, më konkretisht, ndërtimi i marrëdhënieve sa më të mira mes personelit të burgjeve dhe të dënuarve.

Gjithashtu, në panele të veçanta dhe në grupe pune u theksua nevoja për një përzgjedhje më të kujdeshme të personelit në burgje, nevoja e trajnimit vazhdues të tyre, mbikqyrja më e mirë e burgjeve dhe mbështetetja konstruktive e tyre. Për këtë nevojitet,

ndërmjet të tjerash, të përcaktohen kriteret e përzgjedhjes së personelit në burgje, të hartohet plani i karrierës për secilin punonjës në burg si dhe plani i trajnimeve të tyre të vazhdueshme duke iu përshtatur nevojave të personelit të secilit institucion të vuajtjes së dënimit.

Specialistët shqiptarë të burgjeve nënvizuan problemet dhe nevojat që kanë burgjet në drejtimet e mësipërme si dhe përcaktuan prioritetet e secilit institucion të vuajtjes së dënimit në kuadër të zbatimit të një plani konkret veprimi.

Sesioni i parë i këtij bashkëpunimi mes specialistëve shqiptarë të këtyre institucioneve të vuajtjes së dënimit dhe ekspertëve të huaj, i cili u organizua nga KSHH-ja në ambjentet e Burgut të Rrogozhinës, u vlerësua si një hap i parë konstruktiv dhe i nevojshëm në procesin e gjatë të menaxhimit të mirë të burgjeve shqiptare.

Projekti zbatohet gjatë periudhës mars 2004 deri në maj 2005. Kjo veprimtari si edhe të tjerat të përmendura sa më sipër mundësohen financiarisht nga Komiteti Suedez i Helsinkit në shumën prej 112000 Euro dhe mbështetet nga ekspertët suedez dhe hollandezë.

Tiranë më 9 Qershor 2004