KSHH

TEL/FAX

++355(4)233671

MISIONI I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Raport mbi sesionin e tretë të punës ofruar

administratës së burgut të Lezhës

23-24 Shkurt 2006

Komiteti Shqiptar i Helsinkit (KSHH), në datat 23-24 Shkurt 2006, organizoi sesionin e tretë të punës me administratën e burgut të Lezhës. Ky aktivitet u realizua në kuadër të projektit “Reforma në burgje dhe roli i shoqërisë civile në Shqipëri”, i cili ka për qëllim të rrisë shkallën e ndërgjegjësimit dhe të njohjes së të drejtave të njeriut dhe zbatimit të ligjeve nga ana e administratës së burgjeve. Objektivat kryesore të këtij aktiviteti ishin rritja e kapaciteteve profesionale të personelit me uniformë në veçanti dhe personelit të sektorëve të tjerë në këtë burg në përgjithësi lidhur me trajtimin e të dënuarve si edhe për respektimin më të mirë të të drejtave të tyre me qëllim sigurimin e një trajtimi njerëzor dhe human të të dënuarve. Grupi synues i këtij sesioni pune ishin nivelit drejtues, shefat e sektorëve dhe personeli me uniformë. Në këtë sesion ofroi ekspertizën e tij eksperti i huaj Z. Jan van den Brand, Drejtor i Marrëdhënieve me Jashtë në Agjencinë Kombëtare Hollandeze të institucioneve të Riedukimit si edhe në të njëjtën kohë ekspert i Këshillit të Europës për Europën Qendrore dhe Lindore. Në këtë aktivitet, Komiteti Shqiptar i Helsinkit u përfaqësua nga Znj. Edlira Papavangjeli, Kordinatore Programesh.

Sesioni i punës u përqëndrua në disa çështje shumë të rëndësishme lidhur me menaxhimin e burgjeve: a) konceptet dhe kushtet kryesore për trajtimin e të dënuarve nga i gjithë personeli i burgjeve në përgjithësi dhe në veçanti nga personeli me uniformë duke iu referuar Rregullave Europiane të Burgjeve dhe standarteve ndërkombëtare; b) kategorizimi i të dënuarve duke i dhënë një vëmendje të veçantë grupeve të dobëta në burgje si një mekanizëm i rëndësishëm për parandalimin e problemeve dhe tensioneve të ndryshme që mund të ndodhin në burgje si edhe përcaktimi i trajtimit të duhur të këtyre të dënuarve në programin ditor; c) rregulloret për ngjarjet e paparashikuara/incidentet; d) funksionimi i mekanizmit të kërkesë-ankesës në burgje dhe e drejta e të dënuarve për të patur korrespodencë të lirë. E fundit për nga rradha por jo nga rëndësia u zhvillua një diskutim për thithjen e ideve dhe sugjerimeve të pjesëmarrësve lidhur me politikat që duhen zbatuar në burgje për të inkurajuar punësimin e të dënuarve në këto institucione. Metodologjia e përdorur në këtë sesion pune ishin dhënia e çështjeve të ndryshme për diskutim dhe debate në grupe pune.

Rekomandimet e këtij sesioni pune për stafin e nivelit të lartë dhe të mesëm të burgut të Lezhës si edhe gjithashtu për Drejtorinë e Përgjithshme të Burgjeve ishin si më poshtë vijon:

Për parandalimin dhe menaxhimin e situatave sfiduese në burgje, për incidentet dhe krizat duhet të hartohen rregullore të qarta dhe funksionale të cilat duhet të jenë në dispozicion për përdorim të hapur nga çdo anëtar i stafit në sistemin e burgjeve. Gjithashtu, edhe të dënuarit duhet të kenë njohuri lidhur me këto rregullore. Për të siguruar zbatimin në praktikë të këtyre rregulloreve ështe e nevojshme të bëhen trajnime të vazhdueshme. Në përputhje me rregullat për ngjarjet e paparashikuara/incidentet duhet të botohen broshura të ndryshme që janë lehtësisht të aksesueshme nga stafi i burgut gjatë punës së tyre. Një tjetër garanci për njohjen e problemeve në burgje dhe për parandalimin e situatave të tilla është funksionimi i një mekanizmi transparent të kërkesës dhe ankesës. Për këtë qëllim stafi i nivelit të lartë dhe të mesëm në burgje duhet t’i kushtojë vëmendje funksionimit me efikasitet të këtij mekanizimi për të pasur një klimë të mirë në burgje. Stafi në burgjet lokale duhet të përfshihet në procesin e zhvillimeve për punësimin të të dënuarve në burgje, dhënien e mendimeve rreth hartimit të politikave eficiente për mënyrën se si duhet të organziohet puna në burgje në një të ardhme të afërt. Krahas kësaj, drejtorët dhe stafi i burgjeve duhet të jenë përgjegjës për përzgjedhjen e të dënuarve që duhet të punësohen si edhe për të gjitha aspektet e tjera për organizimin e punës në burgje. Zhvillimi i kuadrit ligjor lidhur me punësimin e të dënuarve në burgje duhet të realizohet në të njëjtën kohë me hartimin e politikave zbatuese dhe eficente. E fundit për nga rradha por jo nga rëndësia është e nevojshme përgatitja dhe trajnimi i stafit në burgje për këtë çështje me shumë rëndësi.