KSHH

TEL/FAX

++355(4)233671

MISIONI I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Raport

Sesioni i katërt i punës

Në kuadrin e përmirësimit të sistemit të burgjeve në Shqipëri

ofruar administratës së burgjeve shqiptare

Nga 21-22 Shkurt 2005

Në ambjentet e institucionit të Riedukimit Peqin

Tiranë, më 24.02.2005. Në kuadër të misionit mbrojtës, sensibilizues dhe edukues mbi të drejtat dhe liritë themelore të njeriut, si dhe gjithashtu me qëllim mbështetjen e autoriteteve shqiptare në përpjekjet e tyre për intesifikimin e reformës së ndërmarrë në institucionet penitenciare për një menaxhimin më të mirë dhe bashkëkohor të burgjeve shqiptare, Komiteti Shqiptar i Helsinkit organizoi në datat 21 dhe 22 Shkurt 2005 sesionin e katërt të punës në ambjentet e Burgut të Peqinit. Manuali, që shërbeu si bazë për këtë sesion pune ishte libri “Një këndvështrim i të drejtave të njeriut mbi menaxhimin e burgjeve” si dhe Rregullat Europiane të Burgjeve.

Sesioni i katërt i punës u bazua në detyrat e theksuara si nevoja konkrete të dy burgjeve pilot (përkatësisht të burgut të Peqinit dhe të Rrogozhinës) nga ana e Drejtorit të Përgjithshëm të Burgjeve si edhe nga zyrtarë të tjerë lartë gjatë takimit vlerësues që Komiteti Shqiptar i Helsinkit dhe ekspertët e tij zhvilluan para këtij aktiviteti. Më konkretisht, dy objektivat kryesore të këtij sesioni pune ishte dhënia e asistencës dhe ekspertizës lidhur me strukturën organizative dhe të komunikimit të dy burgjeve pilot, të burgut të Peqinit dhe të Rrogozhinës, si edhe finalizimi i drafit përfundimtar të Rregullores së Brendshme të burgut të Peqinit.

            Në këtë aktivitet, morën pjesë dhe ndihmuan me pjesëmarrjen e tyre Z. Hasan Ahmetaj, Zëvendës Drejtor i Përgjithshëm i Burgjeve, përfaqësues të lartë të Drejtorisë së Përgjithshme të Burgjeve, përfaqësues të sektorit të sigurisë dhe të edukimit në Drejtorinë e Përgjithshme të Burgjeve, drejtuesit e dy burgjeve pilot, përkatësisht të burgut të Peqinit dhe të Rrogozhinës, Drejtori i Institucionit të Paraburgimit Nr. 313 Tiranë si edhe stafi i nivelit të lartë të dy burgjeve pilot. Në këtë sesion ofruan ekspertizën e tyre dy ekspertë të huaj përkatësisht Z. Jan van den Brand, Drejtor i Marrëdhënieve me Jashtë në Agjencinë Kombëtare Hollandeze të Institucioneve të Riedukimit si edhe në të njëjtën kohë ekspert i Këshillit të Europës për Europën Qendrore dhe Lindore dhe Z. Kejs Boeij, Drejtor i Përgjithshëm me një detyrë të veçantë për hartimin e amendamenteve të legjislacionit penal në Hollandë. Në këtë aktivitet, Komiteti Shqiptar i Helsinkit u përfaqësua nga Znj. Edlira Papavangjeli, Koordinatore Programesh.

            Sic u përmend edhe më lart, vëmendja kryesore në këtë sesion u përqëndrua në çështjet e strukturës organizative dhe të komunikimit të dy burgjeve pilot. Ekspertët u paraqitën pjesëmarrësve një prezantim të vizionit dhe qëllimeve të institucioneve të tyre, mënyrat për arritjen e qëllimeve të tilla, çfarë nënkuptohet me institucion penitenciar të mbyllur dhe të hapur duke u nisur nga prespektiva menaxhuese, dhe e fundit në rradhë por jo nga rëndësia ata i paraqitën pjesëmarrësve modele të ndryshme të strukturave organizative dhe të komunikimit të Europës Perëndimore, Lindore dhe Qendrore. Kjo shërbeu si pikënisje për punën për grupet e krijuara nga administrata e burgjeve. Më pas, puna vijoi me analizimin e institucioneve penitenciare shqiptare dhe me përshtatjen e tyre sipas modeleve të paraqitura nga ekspertët në përputhje me institucionet penitenciare shqiptare dhe me kontekstin shqiptar në përgjithësi. Pjesëmarrësit diskutuan çështjet kryesore lidhur me vizionin e mirë të një institucioni penitenciar në zbatim të një strukture të mirë organizative dhe të komunikimit brenda një institucioni riedukimi. Ata arritën në ndërtimin e skemave konkrete për struktura të tilla. Nga ekspertët u trajtuan situata praktike të punës së përditshme në një institucion riedukimi të tilla si raste të grevave kolektive të urisë në një burg, raste të vetvrasjeve ose të vdekjeve natyrore të një të dënuari në burg, raste kur një i dënuar nuk kthehet pas lejes së dhënë nga administrata e burgut etj. Këto raste u analizuan nga pjesëmarrësit të cilët prezantuan procedurat standarte që duheshin ndjekur në situata të tilla.

            E fundit për nga rradha por jo nga rëndësia, sesioni i kushtoi një vëmendje të mjaftueshme finalizimit të Rregullores së Brendshme të rihartuar të burgut të Peqinit. Ky dokument iu nënshtrua disa ndryshimeve në përputhje me komentet dhe sugjerimet e dhëna nga ekspertët e përfshirë në sesionet e mëparshme të punës të organizaura nga KSHH-ja, por ende kishte vend për përmirësime të mëtejshme. Ekspertët, pasi studjuan draftin përfundimtar të Rregullores së Brendshme të burgut të Peqinit, i prezantuan pjesëmarrësve komentet dhe sugjerimet e tyre konkrete për çdo nen të kësaj rregulloreje duke e shqyrtuar atë nën këndvështrimin e standarteve ndërkombëtare si dhe në të njëjtën kohë në përputhje me Rregullat Europiane të Burgjeve. Kjo Rregullore e Brendshme e rishikuar e burgut të Peqinit do t’i dorëzohet Ministrit të Drejtësisë për miratim dhe më pas mund të përdoret për të gjithë institucionet e riedukimit në Shqipëri me një rregjim të sigurisë së zakonshme.

            Në përfundim, pjesëmarrësit, ekspertët e huaj dhe përfaqësuesit e KSHH-së e vlerësuan këtë aktivitet si një aktivitet i sukseshëm për objektivat e vendosura ku teoria dhe praktika u kombinuan natyrshëm. Gjithashtu, ky fakt u theksua edhe në fjalën e mbajtur nga Zëvendës Drejtori i Përgjithshëm i Burgjeve si edhe nga përfaqësues të lartë të këtij institucioni si palë përfituese e këtij aktiviteti. Në sesionin e kartët të punës u arritën disa rezultate të ndryshme të tilla si finalizimi i Rregullores së Brendshme të burgut të Peqinit, fillimi i procesit dhe diskutimi nga ana e administratës së burgjeve lidhur me gjetjen e strukturës më të përshtatshme organizative dhe të komunikimit dhe e fundit në rradhë, por jo nga rëndësia i përgatiti pjesëmarrësit me procedurat standarte që duhen ndjekur në raste konkrete që shpeshherë ndeshen në punën e tyre të përditshme.

     Ky aktivitet u zbatua në kuadër të projektit “Reforma në burgje dhe roli i shoqërisë civile në Shqipëri” i mbështetur financiarisht nga Komiteti Suedez i Helsinkit.