KSHH

TEL/FAX

++355(4)233671

MISIONI I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Raport

mbi sesionin e pestë të punës

Ngritje kapacitetesh ofruar administratës së burgjeve në kuadër të përmirësimit të sistemit të burgjeve

 1 Prill 2005

Në kuadër të misionit mbrojtës dhe edukues mbi të drejtat dhe liritë themelore të njeriut të Komitetit Shqiptar të Helsinkit me qëllim mbështetjen e autoriteteve shqiptare në përpjekjet e tyre për ngritjen e kapaciteteve për administratën e institucioneve të vuajtjes së dënimit, KSHH-ja organizoi në datën 1 Prill 2005 sesionin e pestë të punës.  Qëllimi i këtij sesioni pune ishte për të mbështetur administratën e burgjeve për hartimin e një Kodit Kombëtar të Sjelljes për punonjësit e administrates së burgjeve.

Në këtë aktivitet, morën pjesë dhe ndihmuan me pjesëmarrjen e tyre Z. Engjëll Hysi, Drejtor i Përgjithshëm i Burgjeve, Z. Xhemal Qefaliaj, drejtor i Institucionit të Paraburgimit Nr. 313, Znj. Marinela Sota, drejtore e Institucionit të Riedukimit Nr. 325 Tiranë, si edhe përfaqësues të Drejtorisë së Përgjithshme të Burgjeve Z. Genci Shtylla, dhe Znj. Majlinda Skënderi. Në këtë sesion ofroi ekspertizën e tij eksperti hollandez Z. Jan van den Brand, Drejtor i Marrëdhënieve me Jashtë në Agjencinë Kombëtare Hollandeze të institucioneve të Riedukimit si edhe në të njëjtën kohë ekspert i Këshillit të Europës për Europën Qendrore dhe Lindore. Në këtë aktivitet, KSHH përfaqësohej nga Znj. Edlira Papavangjeli, Koordinatore e Programeve në KSHH dhe drejtuese e këtij projekti. 

Tema kryesore që u trajtua në këtë sesion pune  ishte ajo lidhur me hartimin e një Kodi Shqiptar të Sjelljes dhe mundësisë së zbatimit të këtij Kodi në nivel lokal në çdo institucion të veçantë penitenciar. Diskutimet e pjesëmarrësve u mbështetën mbi eksperiencën hollandeze në këtë drejtim. Eksperti hollandez prezantoi përvojën hollandeze përmes dy modeleve të Kodeve të Sjelljes të dy institucioneve të ndryshme penitenciare si edhe Protokollin Kombëtar Hollandez të Sjelljes. Mbi bazën e tyre, pjesëmarësit në këtë sesion pune përcaktuan parimet dhe drejtimet kryesore të draftit të ardhshëm të Kodit  të Sjelljes për administratën e burgjeve në Shqipëri.

Në fjalën e mbajtur nga Drejtori i Përgjithshëm i Burgjeve Z. Engjëll Hysi u vlerësua ndihma e KSHH-së në dhënien e asistencës ligjore në fusha të ndryshme, në kryerjen e kritikave dhe sugjerimeve konkrete në fushën e përmirësimit të situatës në burgje në kuadër të respektimit të të drejtave të personave të dënuar si edhe në hartimin e një legjislacioni modern dhe bashkëkohor i kontretizuar në hartimin e Rregullores së burgjeve të sigurisë së zakonshme. Në fjalën e tij ai shprehu nevojën e hartimit të një Kodi të tillë i cili duhet të respektojë dinjitetin njerëzor, legjislacionin në fuqi dhe standartet ndërkombëtare.

Kodi i Sjelljes do të jetë gjithpërfshirës pasi do të rregullojë marrëdhëniet midis të dënuarve dhe stafit të administratës së burgjeve si edhe marrëdhëniet e këtyre të fundit midis tyre. Kodi i Sjelljes duhet të ketë mbështetjen e Ministrisë së Drejtësisë si edhe mbështetjen dhe konsensusin e vetë drejtorëve të institucioneve të riedukimit ku ky Kod do të vihet në zbatim.

Nga të gjithë pjesëmarrësit në këtë sesion pune u pranua domosdoshmëria e hartimit të një Kodi Kombëtar të Sjelljes, që do të zbatohej për të gjithë administratën e institucioneve penitenciare, dhe që do të garantonte një marrëdhënie të përshtatshme midis anëtarëve të stafit dhe midis tyre dhe të dënuarve.

Gjithashtu, në këtë sesion pune përmes përvojës hollandeze u diskutua gjerësisht dhe procedura e zbatimit të këtij Kodi Kombëtar të Sjelljes. Për këtë qëllim, pjesëmarrësit propozuan disa projekt-ide për një zbatim efektiv të tij të tilla si nënshkrimi nga punonjësit e ri të rekruar në administratën e burgjeve të një deklarate me anën e së cilës punonjësi merr përsipër të njohë dhe të respektojë të gjithë të drejtat dhe detyrimet që rrjedhin nga Kodi i Sjelljes e cila është një lloj marrëveshje dypalëshe midis punëdhënësit (drejtorit të instituciontit) dhe punëmarrësit (punonjësi i ri i rekrutuar).

Gjithashtu, duke u bazuar në eksperiencën holladeze pjesëmarrësit propozuan krijimin e një Komiteti Kombëtar të Sigurisë dhe të Integritetit i cili do të jetë përgjegjës për hetimin në mënyrë të pavarur të çështjeve të sigurisë dhe të integritetit të tilla si korrupsioni, abuzimet seksuale, përdorimi i paligjshëm i forcës fizike etj., si dhe krijimi i mundësive të tilla në çdo institucion penitenciar. Të pranishmit pranuan se miratimi i këtyre projekt-ideve kërkon jo vetëm miratimin e nivelit të lartë vendimmarrës por edhe marrjen e masave institucionale.    

Në përfundim, Drejtoria e Përgjithshme e Burgjeve mori përsipër të punohej në një grup të vogël pune për hartimin e draftit të parë të Kodit të Sjelljes i cili në stadin e mëvonshëm do të diskutohet me ekspertin dhe përfaqësuesit e KSHH-së. Pjesëmarrësit në këtë session pune vlerësuan këtë aktivitet të sukseshëm për objektivat e vendosura.