Një akt çnjerëzor dhe kriminal  në burgjet italiane

15.10.2002

Ditët e fundit në shyp është njoftuar dhe ka patur jehonë të gjerë një akt çnjerëzor që ka ndodhur në burgjet italiane. Është fjala për fatin tragjik të një të burgosuri shqiptar që është lënë i braktisur në qeli deri në vdekje pas tre muajsh greve urie.

Ai ka qenë akuzuar dhe dënuar për trafik droge nga gjykata italiane. Por ai ka këmbëngulur në pafajësinë e tij dhe ka protestuar kundër këtij dënimi. Rasti është lënë pas dore dhe askush nuk ka marrë mundimin të dëgjojë ankesën e tij. Për këtë ai ka quajtur të akuzuar vendimin ka kërkuar rigjykimin dhe lirimin e tij dhe në shenjë proteste është hedhur në grevë urie. Kjo gjendje ka vazhduar për tre muaj. Gjendja e tij është rënduar jashtë mase dhe megjithatë atij nuk i është dhënë asnjë ndihmë mjekësore. Pas tre muajsh braktisjeje vjen fundi tragjik i vdekjes së tij. Është e pashpjegueshme dhe shkakton indinjatë ky qëndrim i organeve italiane. Shkakton aq më tepër brengosje kur një fakt i tillë tragjik ndodh në një vend si Italia, që shquhet për traditat demokratike dhe për vlerat humane.

Ky është një rast i pastër diskriminimi dhe krijohet bindja se një shtetas Italian nuk do të lirohej të pësonte të njëjtin fat. Ky rast shtron një përgjegjësi të dyfishtë. Së pari, në adresë të autoriteve italine, të cilat duhet ta hetojnë çështjen dhe të marrin masat përkatëse kundrejt fajtorëve nga radhët e policisë italiane. Së dyti, dhe madje dhe aq më shumë përgjigjësi kanë autoritetet shqiptare kanë treguar mospërfillje për fatin e një shtetasi të tyre. Në Itali ka disa përfaqësi shqiptare dhe një ndër to është edhe Konsullata shqiptare në Bari. Detyra e saj është që të përkujdeset për shtetasit shqiptarë në zonën që ajo mbulon. Por është treguar e papërgjegjshme dhe nuk është interesuar fare ka mbajtur heshtje për muaj me radhë nuk i ka bërë asnjë vizitë, është treguar çuditërisht indiferente dhe ka marrë vetëm lajmin e vdekjes së tij në burgun “San Nikola” të Leçes.

Konsullata i është shmangur detyrës, një detyrë elementare që të ndjekë nga afër gjendjen dhe problemet e shtetasve shqiptarë në dhe të huaj.

KSHH bashkohet me indinjatën që ka ngjallur ky rast tragjik. Është detyrë e organeve përkatëse të Ministrisë së Jashtme që të ndalen posaçërisht te kjo çështje, të marrin masat përkatëse në mënyrë që organet e saj jashtë shteti të kryejnë me përpikmëri detyrat e tyre.