Deklarate per shtyp

Mbi konferencën e përbashkët për shtyp të Grupit Grek dhe Komitetit Shqiptar të Helsinkit, në Selanik

15.09.2004

Sot më 15 shtator 2004, në orën 11.30 në Qendrën Balkanike “Media” në Selanik, është mbajtur një konferencë e përbashkët për shtyp e Grupit Grek dhe Komitetit Shqiptar të Helsinkit. Në Konferencë merrnin pjesë Drejtorja Ekzekutive e Komitetit Shqiptar të Helsinkit, Znj. Vasilika Hysi, Z. Panayote Dimitras, përfaqësues i Grupit Grek të Helsinkit dhe Ferhat Çeka, një nga viktimat e keqtrajtimit nga policia kufitare Greke. Përfaqësuesit e Grupit Grek dhe Komitetit Shqiptar të Helsinkit do të ndjekin procesin gjyqësor.

Konferenca për shtyp është mbajtur një ditë para se të zhvillohet gjyqi penal në Gjykatën Penale Ushtarake të Selanikut ndaj autoriteteve ushtarake Greke. Ky është gjyqi i parë i këtij lloji, i cili zhvillohet kundër dhunës së përdorur ndaj Z. Çeka në 8 mars të vitit 2002.

Në deklaratën për shtyp, Z. Dimitras ka shprehur revoltën e tij lidhur me disa fakte të cilat janë interpretuar si veprime diskriminuese ndaj Z. Çeka si, vështirësia e Z. Çeka për siguruar vizën greke për të dëshmuar në gjyq.

Si pasojë e një aksidenti të mëparshëm që ka patur, Z. Çeka është kthyer në invalid duke patur vështirësi në ecje. Megjithëkëtë,  atij nuk i është siguruar një mjet lehtësues transporti në aeroportin e Athinës, ndërkohë që në të njëjtën kohë për një qytetar grek ky shërbim është realizuar. 

Më pas fjalën e ka marrë Znj. Vasilika Hysi, Drejtore Ekzekutive e Komitetit Shqiptar të Helsinkit. Në fjalën e saj, ajo pasi ka falenderuar median e pranishme shprehu angazhimin e Komitetit Shqiptar të Helsinkit që në bashkëpunim me Grupin Grek të Helsinkit të denoncojnë rastet e keqtrajtimit të emigrantëve shqiptarë nga punonjësit dhe policia greke.

Në fjalën e saj, Znj. Hysi shprehu shqetësimin për ksenofobinë dhe albanofobinë e një pjese të qytetarëve Grekë ndaj emigrantëve shqiptarë. “Komiteti Shqiptar i Helsinkit nuk mbështet emigrantët shqiptarë që kryejnë krime, madje në këtë

aspekt, ata duhen vendosur para drejtësisë, por gjithmonë kjo duhet bërë duke respektuar të drejtat që njihen dhe sigurohen nga dokumentat ndërkombëtarë dhe legjislacioni Grek. Rastet e keqtrajtimit të emgirantëve shqiptarë vazhdojnë”, tha Znj. Hysi. Në këtë kuadër Ajo përmendi rastet e fundit tragjike të ndodhura në Greqi siç është rasti i Luan Bërdëllimës (vdekur nga keqtrajtimi që i ka bërë policia Greke) si edhe rasti i  Gramoz Palushit (vrarë pak ditë më parë në ishullin Zakinto të Greqisë). 

Znj. Hysi shprehu shqetësimin e saj për rastet e keqtrajtimit të emigrantëve shqiptarë në kufi, si edhe rastet e tjera flagrante të shkeljes së të drejtave të tyre në proceset gjyqësore, si dhënia e dënimeve më të ashpra për shqiptarët sesa për Grekët, për të njejtat vepra penale. Gjithashtu Znj. Hysi shprehu edhe rastet e tjera të shkeljes së të drejtave të njeriut siç janë dënimi i shqiptarëve në Greqi pa avokat, dhënia e një përkthyesi i cili nuk di gjuhën shqipe, etj.

Znj. Hysi u shpreh se Shqipëria dhe Greqia kanë shumë gjëra që i bashkojnë. Emigrantët shqiptarë në Greqi dhe minoriteti Grek në Shqipëri duhet të shërbejnë si ura lidhjeje dhe jo si ura ndarjeje ndërmjet dy popujve. Ajo u shpreh se gjyqi që do të zhvillohet ditën e nesërme  i cili është gjyqi i parë deri më sot ndaj shtetit Grek, do të shërbejë për të minimizuar rastet e keqtrajtimit të emigrantëve shqiptarë në Greqi.

Më pas fjalën e ka marrë Z. Ferhat Çeka i cili ka shpjeguar ngjarjen e ndodhur. Media është interesuar sidomos lidhur me faktin se çfarë do të kërkojë Z. Çeka në senacën e ditës së nesëme. Z. Çeka ka bërë të ditur se ai do të kërkojë ndëshkimin e fajtorëve si dhe dëmshpërblimin material, moral dhe psikologjik.