Ndal dhunës të policisë greke ndaj shqiptarëve

Në bazë të njoftimeve të shtypit dhe të verifikimit që u bë në vënd nga korrespondenti i këtij Komiteti në qytetin e Elbasanit, ka rezultuar se policia ushtarake greke në afërsi të kufirit shqiptar ka ndaluar dhe ka keqtrajtuar egërsisht shtetasit shqiptarë Ligor Halilin, Mili Halilin, dhe Rrahman Pashollarin. Dëmtime veçanërisht të rënda dhe të rrezikshme për jetën i ishin shkaktuar Ligor Halilit i cili u operua me urgjencë në spitalin e Elbasanit.

Komiteti Shqiptar i Helsinkit dënon këtë akt barbar të policisë greke dhe kërkon që fajtorët të vihen para përgjegjësisë së ligjit. Raste të tilla kanë qënë të përsëritura, por autoritetet shqiptare nuk kanë reaguar në kohën dhe me forcën e duhur. Publiku shqiptar, të dëmtuarit dhe familjarët e tyre duan të dinë jo vetëm qëndrimin e autoriteteve përkatëse shqiptare por edhe hapat e ndërmarra pranë qeverisë greke për ti dhënë fund akteve të tilla të dënueshme edhe nga legjislacioni grek, që veçanërisht ndaj emigrantëve shqiptarë kanë tipare diskriminuese të papajtueshme me normat ndërkombëtare.

Tiranë 18 shtator 2003