Dhunë e organeve kufitare maqedonase

 

Tiranë, më 20.06.2003
Në shtyp kanë dalë herë pas here njoftime mbi masat ekstreme në dëm të qytetarëve shqiptarë dhe që shkojnë deri në vrasje. Njoftime të tilla kanë dalë edhe këto ditët e fundit.

Është e drejtë e njohur e shtetit për të ruajtur kufirin e tij dhe për të mos lejuar kalime të tij të paligjshme. Por jeta e personit është e shenjtë dhe çdo masë është e jusitifikuar, por vrasja ëshë një akt kriminal kur shkelja e kufirit nuk shoqërohet me rreziqe për shtetin kufitar.

Çfarë rreziqesh mund t’i kanosen shtetit tonë fqinj Maqedonisë nga orvatje që mund të bëhen për kalimin e kurifit të saj. Masat që mund të merren kundrejt një shkelësi të kufirit duhet të jenë në përpjestim të drejtë me veprën e kryer prej tij. Kurse vrasjet në kufi e kalojnë çdo masë.

Akte të tilla të përsëritura të organeve kufitare maqedonase kundrejt shtetasve shqiptarë, përveç që përbëjnë një shkelje të rëndë të të drejtave të njeriut janë edhe në kundërshtim me frymën e përgjithshme të fqinjësisë së mirë që duhet të karakterizojë marrëdhëniet midis Maqedonisë dhe Shqipërisë.

KSHH bën thirrje që autoritetet kompetente të shprehin shqetësimin e tyre pranë autoriteteve maqedonase përkatëse dhe ta trajtojnë atë si një çështje tepër serioze që mund të shkaktojë tensione në dëm të fqinjësisë së mirë. KSHH ju bën thirrje edhe organizatave homologe të të drejtave të njeriut të ushtrojnë presion mbi autoritetet maqedone, me qëllim që ato të mos shkelin të drejtat të shtetasve dhe të cënojnë frymën e fqinjësisë.