SHKELJE E RËNDË E TË DREJTAVE TË NJERIUT

NGA AUTORITETET GREKE

20. 08. 2002

Në pikat kufitare të Kapshticës dhe të Kakavijës është krijuar një situatë tepër e rëndë.  Me mijëra janë emigrantët shqiptarë që kërkojnë të kthehen në Greqi duke patur me vete të gjitha dokumentet përkatëse.  Autoritetet greke kanë treguar një nënvleftësim të pashpjegueshëm të kthimit të emigrantëve shqiptarë në Greqi.  Korrespondentja e KSHH nga Gjirokastra ka shkuar në vend dhe ka raportuar për mijëra vetë, të rritur e fëmijë, që detyrohen të kalojnë netë me radhë jashtë në qiell të hapur.  Kolonat e makinave arrijnë në disa kilometra.  Në këto rrethana ka patur mjaft raste kur njerëzit, veçanërisht fëmijët, nuk u kanë bërë dot ballë rrethanave tepër të vështira dhe ndërhyrja në këto kushte shëndetësore ka qenë e nevojshme.

Autoritetet greke kanë kryer kështu shkelje flagrante dhe të rënda të të drejtave të njeriut duke marrë nëpër këmbë rregullat më elementare dhe duke i shkaktuar vuajtje një popullsie të tërë që është përqendruar në pikat kufitare.

Nga ana e tyre, autoritetet shqiptare nuk kanë reaguar në kohën dhe në shkallën e duhur dhe për pasojë nuk ka pasur një zgjidhje të shpejtë të problemeve.  Gjithsesi për situatën e krijuar kanë përgjegjësi të caktuar edhe autoritetet shqiptare, të cilat nuk vepruan me seriozitetin e duhur që të ndërhynin me shpejtësi pranë autoriteteve greke për të kërkuar respektimin e të drejtave elementare të emigrantëve.  Mospërfillja e gjatë e autoriteteve greke u interpretua në opinionin publik si shfaqje e disa paragjykimeve raciste kundrejt emigrantëve shqiptarë, shfaqje që nuk mungojnë edhe gjatë qëndrimit dhe punës së tyre në tokën greke.