Çfarë i ka ndodhur Remzi Hoxhës?

Tiranë, më 21 tetor 2004

Në përvjetorin e “zhdukjes” së Remzi Hoxha, më 21 Tetor 1995, Amnesty International dhe organizatat shqiptare të të drejtave të njeriut solidarizohen me familjen e tij për të nxitur autoritetet shqiptare në qartësimin e këtij rasti.

“Familja e Remzi Hoxha ka pritur 9 vjet për të sqaruar fatin e tij. Është detyrë e shtetit shqiptar t’i përgjigjet apelit të tyre dhe të vendosë para përgjegjësisë personat përgjegjës për “zhdukjen” e tij”- thanë organizatat.

Nëntë vjet më parë, Remzi Hoxha, i moshës 40 vjeç, është zhdukur nga vendi i punës në Tiranë. Sipas dëshmitarëve ai është rrëmbyer nga njerëz të veshur me rroba civile në një makinë e cila sikurse u identifikua më pas, i përkiste Shërbimit Informativ Kombëtar (SHIK). Familja menjëherë denoncoi zhdukjen e tij dhe u kërkonte policisë dhe autoriteteve shtetërore për të marrë të dhëna mbi fatin e Remzi Hoxhës.

Deri më tani, ata nuk kanë marrë ende asnjë informacion nga autoritetet shtetërore mbi fatin e tij.

‘“Zhdukjet” janë shkelje të ligjeve dhe standarteve ndërkombëtare të të drejtave të njeriut. Ato janë gjithashtu akte të një egërsie ekstreme e cila cënon si personat e zhdukur, ashtu edhe familjarët dhe miqtë e tyre”-tha Amnesty International.

Organizatat theksuan të ditur se vuajtjet e vazhdueshme e të afërmve të të zhdukurit-të cilëve u është mohuar njohja fatit të të dashurit të tyre-arrin deri në dhunimin e të drejtave të tyre sipas nenit 3 të Konventës Evropiane për Liritë dhe të Drejtat Themelore të Njeriut., për të mos qenë objekt i torturës ose trajtimit çnjerëzor dhe degradues.

Historia

Remzi Hoxha, i martuar me 5 fëmijë, kishte ardhur në Tiranë nga Kosova më 1992, ku ai kishte qenë aktiv në mbështetjen e çështjes kombëtare shqiptare. Më parë ai jetonte në Maqedoni.

Megjithë hapjen e hetimeve lidhur me “zhdukjen” e Remzi Hoxhës, nuk pati ndonjë progres të madh. Në vitin 2003 hetimet u rihapën me ndërhyrjen e Avokatit të Popullit ndaj të cilit kishte apeluar familja e Remzi Hoxhës. Në maj 2003, tre oficerë të SHIK-ut u arrestuan dhe u mbajtën në gjendje arresti për hetim në bazë të akuzave për rrëmbim, mbajtje peng dhe torturë me pasoja të rënda. Në gjykatë, dy prej tyre pranuan se kishin marrë pjesë në arrestimin e Remzi Hoxha dhe të një personi tjetër, Ziso Kristopulli, i cili rrëfen se ishte torturuar para se të lirohej pas 5 ditëve. Megjithatë, dy të akuzuarit thanë se ata kishin ndjekur urdhërat, dhe se ata nuk kishin marrë pjesë në akte të torturës dhe nuk e dinë  çfarë i kishte ndodhur Remzi Hoxhës. I akuzuari i tretë, ish-shef i SHIK-ut të Tiranës, i mohoi të gjitha akuzat. Me sa duket urdhrwr arresti u lëshua edhe për 6 persona të tjerë të cilët rezultojnë të jenë larguar nga vendi dhe ndoshta janë në Angli.

Në shtator 2003 shtypi raportoi se hetimet kundër 3 të akuzuarve kishin përfunduar dhe çështja do të kalonte së shpejti në gjykatë. Megjithatë, në nëntor prokurori ka pushuar akuzen në ngarkim të njërit prej të akuzuarve, dhe në maj 2004 dy të tjerët u liruan me vendim gjykate, pasi gjykata vlerësoi se prokuroria nuk kishte siguruar provat e mjaftueshme të cilat justifikonin mbajtjen në arrest të të akuzuarve.

Nënshkruajnë këtë deklaratë:

Amnesty International

Komiteti Shqiptar i Helsinkit

Grupi Shqiptar për të drejtat e Njeriut

Qendra Shqiptare e Rehabilitimit të Traumës dhe Torturës 

Këshilli për Mbrojtjen e të Drejtave e të Lirive të Njeriut