KSHH

TEL/FAX

++355(4)233671

Misioni I KSHH-së

Misioni kryesor I KSHH-së është vëzhgimi I respektimit të të drejtave dhe lirive të njeriut dhe reagimi për rivënien e tyre në vend, sensibilizimi I shtetasve mbi mbrojtjen e të drejtave dhe lirive të tyre; përmirësimi I legjislacionit dhe praktikës për zbatimin e ligjit nëpërmjet oponencave dhe rekomandimeve si në fazën e draftimit të tyre, ashtu edhe gjatë zbatimit të tyre.

Gjykatat greke kanë shansin të dëshmojë efektivitetin e tyre në luftën kundër racizmit dhe ksonofobisë

Në datën 25 nëntor 2005, në Patra të Greqisë do të zhvillohet gjyqi penal lidhur me vrasjen e emigrantit shqipar Gramoz Palushi.

Një viti më parë, më datë 4 shtator 2004, emigranti shqiptar Gramoz Palushi është goditur në mënyrë vdekje prurëse nga një shtetas grek në ishullin Zakintho të Greqisë. Ngjarja ndodhi ditën e fitores së skuadrës shqiptare në ndeshjen e futbollit Shqipëri-Greqi. Sulmi vdekjeprurës u krye vetëm sepse emigranti shqiptar Gramoz Palushi demonstroi gëzimin e tij për fitoren e ekipit shqiptar në një ndeshje futbolli duke shpalosur flamurin kombëtar.

Opinioni publik, media shqiptare dhe greke, autoritetet shtetërore të të dy vendeve dënuan ashpër këtë akt barbar, shprehje e ksenofobisë dhe racizmit. Komiteti Shqiptar i Helsinkit me anë të deklaratës së tij publike të datës 6 shtator 2004 ka reaguar ndaj këtij akti dhe i ka kërkuar autoriteteve greke marrjen e masave përkatëse për vënien e fajtorëve para përgjegjësisë ligjore.

Duke ndjekur ecurinë e hetimeve mbi vrasjen e emigrantit shqiptar, Komiteti Shqiptar i Helsinkit së bashku me Monitorin Grek të Helsinkit, në shkurt të vitit 2005, kanë shprehur shqetësimin në një konferencë të përbashkët për shtyp duke theksuar se “hetimi i rastit të Gramoz Palushit të vrarë nga një racist pas ndeshjes së futbollit Shqipëri-Greqi në shtator 2004 duket se ka gjetur një vlerësim “komod” psikiatrik të autorit të krimit, ç’ka është shkencërisht e gabuar”.

Sot pas një vit, në prag të fillimit të procesit gjyqësor ndaj autorit të këtij krimi makabër: 

• Duke besuar në vlerat e një vendi demokratik, anëtare e Bashkimit Europian siç është Greqia; 

• Duke theksuar rëndësinë që ka respektimi i parimeve të sanksionuara në Konventën Europiane të të Drejtave të Njeriut  të ratifikuar nga Greqia lidhur me zhvillimin e një procesi të rregullt dhe ligjor;

•  Duke vlerësuar rëndësinë e pavarësisë së sistemit gjyqësor në vendet  demokratike;

•  Duke  vlerësuar rëndësinë  e luftës kundër shprehjeve të ksenofobisë dhe të racizmit në Europë në përgjithësi dhe në Greqi, në  veçanti;

•  Duke vlerësuar nevojën e bashkëpunimit dhe frymën e miqësisë që ekziston midis  vendeve fqinje;

•  Duke vlerësuar  rëndësinë e respektimit të të drejtave të viktimave;

•  Duke sjellë në vëmendje e autoriteteve gjyqësore greke përfundimet e institucioneve ndërkombëtare monitoruese si ECRI  i cili në raportin e tij të tretë për Greqinë, të bërë public në korrik 2004 thekson se “ECRI i rekomandon autoriteteve greke të forcojnë dispozitat ligjore dhe zbatimin e tyre në ligjet penale, civile dhe administrative me qëllim që të luftojnë racizmin dhe diskriminimin dhe ”të rrisin përpjekjet  për të ndërgjegjësuar  punonjësit civile, publikun në tërësi dhe media rreth të drejtave të njeriut dhe problemeve të racizmit dhe intolereancës”.

Komiteti Shqiptar i Helsinkit   beson se: 

1. Autoriteteve gjyqësore greke do të zhvillojnë një  proces të rregullt gjyqësor, të paanshëm dhe objektiv kundër autorit të krimit që mori jetën e emigrantit shqiptar Gramoz Palushi;

2. Se drejtësia greke në zbatimin e politikës penale do të mbajë parasysh rrezikshmërinë e veprës dhe autorit dhe pasojat e rënda të ardhura nga vepra kriminale e kryer;

3. Se  gjykata greke do ta mbajë parasysh  motivet raciste, teje të rënda për të cilat u krye vepra  penale;

4. Se interesat e viktimës do të vlerësohet në përputhje me standartet Europiane lidhur trajtimin dhe dëmshpërblimin e viktimave.

 Komiteti Shqiptar i Helsinkit rithekson edhe një herë idenë se aktet e dhunshme, të ksenofobisë dhe të racizmit cënojnë rëndë atmosferën e shëndoshë midis popujve tanë.

Drejtësia greke ka shansin të tregojë se ajo është e vendosur të dënojë ashpër çdo shfaqje racizmi dhe intolerance, e kryer nga kushdo qoftë.