Konferenca për shtyp

GJYQI I SOTEM MBI VRASJEN E  VULLNET BYTYÇIT I PADREJTE

Tiranë, 23 shkurt 2005

Sot, në Kastoria (Kostur) Greqi, në Gjykatën Tre-palëshë të Kundravajtjeve po zhvillohet gjyqi i rojes kufitare që vrau më 23shtator  2003, 18-vjecarin Vullnet Bytyçi.

18 vjeçari Bytyçi u qëllua pas koke e u vra nga punonjës të policisë greke afër pikës së kontrollit Kapshticës ndërkohë që po përpiqej t’i shpëtonte arrestimit. Katër shqiptarë të tjerë me të cilët ai po udhëtonte për në Greqi me qëllim punësimi, Alfred Ramadan Metaliaj, S. Metaliaj, Beqir Osman Metaliaj dhe Bilbil Selman Metaliaj, u arrestuan dhe u liruan më vonë dhe u kthyen në Shqipëri më 27 shtator 2003. Sipas njoftimeve,  personi i gjashtë Luan Metaliaj i shpëtoi arrestimit dhe u fsheh për 24 orë para se të kthehej në Shqipëri. Sipas njoftimeve një plumb i përshkoi xhaketën pa e plagosur gjatë arratisjes. Policia greke raportoi se një polic i rojës kufitare  qëlloi në ajër që të parandalonte arratisjen e tij si dhe qëndrimin e tyre kërcënues ndaj njërit  koleg të tij. Pati njoftime se në kohën kur ai u qëllua, 18-vjeçari Bytyçi ndaloi vrapin e tij dhe nuk paraqiti ndonjë rrezikshmëri.

Autoritetet greke njoftuan në atë kohë se polici i rojes kufitare përgjegjës për vrasjen do të gjykohej sipas ligjit grek. Megjithëse ai u  akuzua në fillim për krimin e vrasjes nga pakujdesia, Këshilli i Kundravajtjeve më vonë i ndryshoi akuzat nga krim, në kundravajtje. Akoma më keq,sot më 23/2/2005 asnjë nga dëshmitarët e familjes Metaliaj nuk u lejua të dëshmonte para gjykatës.

Për të gjitha këto arsye, Komiteti Shqiptar i Helsinkit (KSHH) dhe Vëzhguesi i Helsinkit Grek (VHG) e konsiderojnë këtë një gjyq të padrejtë, si shkelje të Nenit 6 të Konventës Europiane të të Drejtave të Njeriut.  Ata i bëjnë thirrje autoriteteve greke ta shqyrtojnë procedurën dhe të sigurojnë zhvillimin e një gjyqi të paanshëm me praninë e të gjithë dëshmitarëve. Gjithashtu ata duhet t’u japin dëmshpërblim të mjaftueshëm familjes së viktimës.

Në mënyrë më të përgjithshme, KSHH dhe VHG kujtojnë se Komisioni Europian kundër Racizmit dhe Intolerancës (ECRI) ‘ka shprehur keqardhjen’ për mungesën e zhvillimit të një procesi të duhur në hetimet për shkeljen e të drejtave të njeriut të shqiptarëve dhe shprehu besimin ‘se kjo nuk do të tolerohet më’. Është koha e duhur që Greqia ta zbatojë këtë rekomandim.

KSHH dhe VHG u kërkojnë gjithashtu autoriteteve shqiptare të marrin përsipër mbrojtjen e të drejtave të shqiptarëve para gjykatave greke  në të njëjtën mënyrë siç bëjnë qeveritë e tjera europiane për qytetarët e tyre në Greqi. Vetëm kështu shqiptarët do të kenë mundësi të një trajtimi të drejtë në Greqi siç kanë  qytetarët e vendeve të tjera europiane të cilëve u jepet mbështetje nga autoritetet konsullore të vendeve të tyre.