NJË AKT TJETËR DHUNE NGA POLICIA MAQEDONASE

25.09.2001 

KSHH ka reaguar më se një herë ndaj akteve të dhunës nga policia maqedonase kundër qytetarëve shqiptarë:

Dy gazetarë të Tiranës kanë sjellë një dëshmi të re të këtij brutaliteti. Ata janë gazetarët e TV Klan dhe TV Koha, përkatësisht Agim Blloshmi dhe Haxhi Balliu. Gjatë një vizite në Maqedoni ata janë arrestuar dhe keqtrajtuar nga policia maqedonase dhe nga një grup paraushtarakësh. Të dy gazetarët kishin shkuar në Maqedoni për të ndjekur nga afër, me kamerat e tyre, ngjarjet në pjesën veri-perëndimore të vendit, zonë e përpjekjeve midis forcave maqedonase dhe UÇK. Ata kishin fiksuar momente të dorëzimit të armëve nga UÇK-ja, kishin bërë intervista si me luftëtarët ashtu edhe me njerëz të thjeshtë, kishin filmuar edhe fshatra e shtëpi të djegura nga policia dhe ushtria maqedonase. Me datën 20 shtator në afërsi të Kërçovës ata ndeshen me një njësi të policisë maqedonase, e cila i merr me dhunë dhe i shoqëron në një repart policor. Gazetarëve u janë vënë prangat dhe mandej ata u janë nënshtruar pyetjeve me shprehje fyese të policëve që bënin aluzione edhe për lidhje me fondamentalizmin islamik. Gazetarët u liruan vetëm pas ndërhyrjes së drejtuesve të PDSH-së në Strugë.

KSHH e denoncon këtë rast të ri të intolerancës së autoriteteve maqedonase ndaj qytetarëve shqiptarë. Ai e sjell këtë shembull në vëmendjen e organizatave të mëdha të të drejtave të njeriut Amnesty International dhe Human Rights Ëatch, të cilat janë ndalur posaçërisht në situatën e të drejtave të njeriut në Maqedoni, në dritën e ngjarjeve të fundit.